“დღევანდელი რადიკალური ოპოზიცია პრაქტიკულად ისეა დასუსტებული რომ მიერთებულია აპარატზე, მაგრამ ირაკლი კობახიძემ იცის ეს აპარატი როგორ გამორთოს”

მართალია დღევანდელი რადიკალური ოპოზიცია პრაქტიკულად ისე დასუსტებულია, რომ მიერთებულია აპარატზე, მაგრამ ირაკლი კობახიძემ ისიც იცის ეს აპარატი როგორ გამორთოს და სწორედ აქედან გამომდინარეა, რომ თითქოს სახე იცვალა „ნაციონალურმა მოძრაობამ“, – ამის შესახებ „ხალხის ძალის“ ერთ-ერთმა ლიდერმა გურამ მაჭარაშვილმა „იმედი LIVE“-ში განაცხადა.

„დღევანდელ დღეს საქართველოს პარლამენტში პირველად მოხდა, რომ საპარლამენტო რესპუბლიკაში პრემიერ-მინისტრად ავირჩიეთ ადამიანი, რომელსაც გამოცდილება აქვს პარლამენტის საქმიანობის, მათ შორის, მაღალ საპარლამენტო თანამდებობებზე. ამას აქვს ძალიან დიდი მნიშვნელობა. ირაკლი ღარიბაშვილმა, საკმაოდ წინ წაწია ეს ქვეყანა ჯერ პირველ და მერე, მეორე პრემიერობის დროს როგორც საგარეო, ისე საშინაო მიმართულებით. ახლა უკვე ირაკლი კობახიძეს მოუწევს, რომ ბოლომდე ჩვენ ყველამ ერთად, მისი მეთაურობით, მივიყვანოთ ყველა ეს დაწყებული საქმე ბოლომდე. ჩვენ ვიცით, რომ პარლამენტი არის ის ადგილი, სადაც პირველი პოლიტიკური ქარცეცხლია და პოლიტიკური ოპოზიცია პირველი სწორედ აქ ცდილობს ყველა ქვეყანაში, რომ მოიგოს ეს პოლიტიკური ბრძოლა და მერე მოვიდეს ხელისუფლებაში. სწორედ ეს ყველა ბრძოლის ხერხი იცის ირაკლი კობახიძემ. ოპოზიციამ იცის, რომ კობახიძემ იცის ყველა ხერხი, თუ როგორ არ მოაგებინოს ოპოზიციას. მართალია, დღევანდელი რადიკალური ოპოზიცია პრაქტიკულად ისეა დასუსტებული, რომ მიერთებულია აპარატზე, მაგრამ ირაკლი კობახიძემ ისიც იცის, ეს აპარატი როგორ გამორთოს და სწორედ აქედან გამომდინარეა, რომ თითქოს სახე იცვალა „ნაციონალურმა მოძრაობამ“. სახე კი არ იცვალა, უბრალოდ შოკში ჩავარდნენ, რომ პოლიტიკური მეტოქე, რომელიც ასევე ძლიერი იყო, ირაკლი ღარიბაშვილი და ყოველთვის მოგებული მიდიოდა პარლამენტიდან, ახლა უკვე თვითონ პარლამენტიდან გადავიდა აღმასრულებელ ხელისუფლებაში [ირაკლი კობახიძე]“,- აღნიშნა მაჭარაშვილმა.