ამერიკის ყოფილი პრეზიდენტის, დონალდ ტრამპის განცხადებით, ის წაახალისებდა რუსეთს, რომ თავს დასხმოდა ნატოს ნებისმიერ წევრს, რომელიც არ გადაიხდიდა გადასახადებს, როგორც სამხედრო ალიანსის ნაწილი. ამის შესახებ ტრამპმა სამხრეთ კაროლინელ ამომრჩევლებთან შეხვედრისას განაცხადა. ყოფილმა პრეზიდენტმა აღნიშნა, რომ ნატოს წევრ ქვეყნებს ბარაკ ობამა იმის გამო უყვარდათ, რომ ის მათგან არაფერს მოითხოვდა, თავად კი ნატოს წევრი ქვეყნების ლიდერებს სამხედრო ბიუჯეტის გაზრდას აიძულებდა, რადგანაც არ სურდა, ვინმეს შეერთებული შტატები სულელ ქვეყნად ჩაეთვალა.
„ერთხელ ერთ-ერთი ქვეყნის ლიდერმა იკითხა, რა მოხდებოდა იმ შემთხვევაში, თუ მისი ქვეყანა გადასახადებს არ გადაიხდიდა და რუსეთის თავდასხმის ქვეშ აღმოჩნდებოდა. მე ვუპასუხე – არ გადაიხადე? დამნაშავე ხარ? მან თქვა: დიახ, ვთქვათ და ასე მოხდა, რაზეც ვუპასუხე: – ამ შემთხვევაში მე არ დაგიცავ, პირიქით, მე მათ გავამხნევებდი, რომ გაეკეთებინათ ის, რაც საჭიროა. თქვენ უნდა გადაიხადოთ გადასახადები. მაშინ მათ ობამა უფრო მოსწონდათ, რადგან ობამა არაფერს სთხოვდა. მსოფლიოს თვალში სულელ ქვეყანას ვგავდით, ჩვენ კი სულელი ქვეყანა აღარ ვიქნებით“, – განაცხადა ტრამპმა.