სომხეთი აზერბაიჯანს ცეცხლის გახსნაში ადანაშაულებს. როგორც სომხური მხარე იუწყება, აზერბაიჯანის მიერ გამთენიისას, 05:30 საათისთვის გახსნილ ცეცხლს საზღვართან მდებარე ნერქინ ჰანდის დასახლებაში ორი ადამიანი ემსხვერპლა და რამდენიმე დაშავდა.
აზერბაიჯანული მხარის ცნობით, სომხური მხარის პროვოკაციული ქმედების საპასუხოდ ჩატარდა ოპერაცია „შურისძიება“, რომლის ფარგლებშიც განადგურდა სომხეთის საბრძოლო პოსტი სოფელ ნერქინ ჰანდის რაიონში, საიდანაც, მათი ცნობით, რამდენიმე საათით ადრე, 20:50 საათიდან 23:40 საათის პერიოდში აზერბაიჯანული პოზიციების მიმართულებით, კერძოდ, კოხანაბისკენ ცეცხლი გახსნეს. აზერბაიჯანის ცნობით, საპასუხო დარტყმისას სომხურმა მხარემ დანაკარგები განიცადა.
სომხეთის თავდაცვის სამინისტრო ცეცხლის განხსნის თაობაზე აზერბაიჯანული მხარის ბრალდებას უარყოფს.