„ლელო“ როგორც ჩანს სადღაც სივრცეშია დაკარგულ-გაბნეული და ვერ ხვდება, რომ სამუშაო ჯგუფებში უნდა იჯდეს, – ამის შესახებ პარტია „მოქალაქეების“ ლიდერმა ალეკო ელისაშვილმა განაცხადა.
„პირადი მონაცემების დაცვის სამსახურთან მუშაობასთან დაკავშირებით, ან სპეციალურ საგამოძიებო სამსახურის მუშაობასთან დაკავშირებით, ვენეციის კომისიას რა დასკვნებიც ჰქონდა, როგორ შეიძლება გაუმჯობესდეს ამ სამსახურების მუშაობა, ამაზე ვმსჯელობთ. ჩვენი პარტია წინა სამუშაო ჯგუფებში რომ ვმონაწილეობდით, მთელი ოპოზიცია გვლანძღავდა და გვეუბნებოდა, აი, როგორ, რანაირად, ყავის დასალევად გიხარიათ შესვლა „ქართულ ოცნებასთანო“. ვამბობდით – აქ მივდივართ იმიტომ, რომ ეს არის ევროკავშირის რეკომენდაცია. შემდეგ, ყველა დახურულ შეხვედრაზე, ევროკავშირის ლიდერები, მათ შორის ბორელი, ესაუბრებოდნენ ჩემს ოპოზიციონერ კოლეგებს და ეკითხებოდნენ, რატომ არ სხედხართ ამ შეხვედრებზე, ამ სამუშაო ჯგუფებშიო. სწორი დასკვნები გამოიტანეს „ნაციონალურმა მოძრაობამ“ და „ვაშაძის პარტიამ“, ერთიც და მეორეც არის წარმოდგენილი, მაგრამ „ლელო“ როგორც ჩანს სადღაც სივრცეშია დაკარგულ-გაბნეული და ვერ ხვდება, რომ აქ უნდა იჯდეს“,- აღნიშნა ელისაშვილმა.
სპეციალურ საგამოძიებო და პერსონალურ მონაცემთა დაცვის სამსახურების ნორმების ცვლილება, ანტიკორუფციულ ბიუროსა და საერთო სასამართლოების შესახებ კანონმდებლობაზე მსჯელობა ევროკავშირის მიერ განსაზღვრული ცხრა ნაბიჯის ფარგლებში დღევანდელ სამუშაო შეხვედრაზე გაწერილი საკითხებია. „ლელო“ ერთადერთი პარტიაა, რომელიც პროცესს ემიჯნება და ბოიკოტს განაგრძობს.