საქართველოს კულტურული მემკვიდრეობის დაცვის ეროვნული სააგენტოს დაკვეთით გურჯაანის მუნიციპალიტეტში მდებარე ეროვნული მნიშვნელობის კატეგორიის კულტურული მემკვიდრეობის ძეგლის, სანაგირის ღვთისმშობლის სახელობის ტაძრის, სარეაბილიტაციო სამუშაოები დასრულებულია. ინფორმაციას კულტურის სამინისტრო ავრცელებს.
უწყების ცნობით, შესრულებულ სამუშაოებს გაეცნენ სსიპ საქართველოს კულტურული მემკვიდრეობის დაცვის ეროვნული სააგენტოს დირექტორი ნიკოლოზ აზნაურაშვილი, პარლამენტის წევრი დავით სონღულაშვილი, გურჯაანის მერის პირველი მოადგილე ლერი გელენავა და სააგენტოს არქიტექტორ-რესტავრატორები.
„სარესტავრაციო სამუშაოები ითვალისწინებდა: ეკლესიის სახურავის თუნუქის საბურვლის, სარინელისა და სანიაღვრე არხის მოწყობას, ასევე კირის დუღაბით ცენტრალური ნავის ზედა ნაწილისა და წმინდა ბარბარეს ეკლესიის სამხრეთ ფასადის საპირე წყობის ამოგოზვას; რეაბილიტაციის ფარგლებში ასევე მოიხსნა ადრეული რესტავრაციის პერიოდში გამოყენებული ცემენტის ხსნარი. ჩატარდა კედლის მხატვრობის გადაუდებელი საკონსერვაციო სამუშაოები.
2022 წელს ღვთისმშობლის სახელობის სამნავიანი ბაზილიკის გადახურვაზე ხარვეზების არსებობა დადგინდა, რის გამოც საქართველოს კულტურული მემკვიდრეობის დაცვის ეროვნულმა სააგენტომ 2023 წელს დააფინანსა ტაძრის კვლევითი და საპროექტო-სახარჯთაღრიცხვო დოკუმენტაცია და იმავე წელს ხელშეკრულება გაფორმდა ელექტრონულ ტენდერში გამარჯვებულ კომპანია შპს „იბექსთან“. სააგენტომ სამუშაოებისთვის 634 755 ლარი გამოყო.
სანაგირე – სამნავიანი ბაზილიკა მხატვრულ-არქიტექტურული ღირებულებით, ქართული ქრისტიანული ხუროთმოძღვრების ერთ-ერთი საინტერესო და სახასიათო ძეგლია. ღვთისმშობლის ეკლესია დიდი სამონასტრო კომპლექსის მთავარი ტაძარია. ეს არის მეათე საუკუნის სამნავიანი ბაზილიკა, რომელზეც X-XI და XI-XII საუკუნეებში მიშენებულია სამნაწილიანი კარიბჭე ჩრდილოეთიდან და დარბაზული ეკლესია სამხრეთიდან. ტაძარი მთლიანად მოხატული იყო, თუმცა ჩვენამდე მხოლოდ ფრაგმენტებმა მოაღწია.
სანაგირის ღვთისმშობლის სახელობის ტაძარს კულტურული მემკვიდრეობის ძეგლის სტატუსი 2006 წლის 30 მარტს მიენიჭა, ხოლო ეროვნული მნიშვნელობის კატეგორია 2006 წლის 7 ნოემბერს განესაზღვრა“, – ნათქვამია ინფორმაციაში.