საყდრისის კომიტეტი ჯვრის მონასტერში მომხდარი ვანდალიზმის ფაქტზე განცხადებას ავრცელებს და შესაბამის ორგანოებს დაუყოვნებლივი რეაგირებისკენ მოუწოდებს.
„მცხეთის ჯვრის მონასტერში ვანდალიზმის შემთხვევა დაფიქსირდა – უცხო ქვეყნის მოქალაქემ ეკლესიის შეურაცხყოფის კადრები სოციალურ ქსელში თავად გაავრცელა.
კადრებში ჩანს, როგორ აკეთებს იგი წარწერებს VI საუკუნის მსოფლიო კულტურული მემკვიდრეობის ძეგლთა სიაში შეტანილი ტაძრის კედლებზე.
ჯვრის მონასტრის მღვდელმსახურები ამბობენ, რომ მსოფლიო მნიშვნელობის ძეგლის დაზიანება ქვეყნის შეურაცხყოფაა.
„საყდრისის კომიტეტი კულტურული მემკვიდრეობისთვის“ გმობს ამ ვანდალურ ქმედებას მსოფლიო კულტურული მნიშვნელობის მატარებელ ძეგლზე და შესაბამის ორგანოებს დაუყოვნებლივი რეაგირებისკენ მოუწოდებს, რამეთუ ასეთი დანაშაული საქართველოს კანონმდებლობით ისჯება.
გარდა ამისა, მოვუწოდებთ ადგილობრივი მუნიციპალიტეტის წარმომადგენლობას, თვალყური ადევნოს ძეგლის მიდამოებში ტურისტების უკონტროლო გადაადგილებას“, – ნათქვამია განცხადებაში.