რაჭა-ლეჩხუმ ქვემო სვანეთში სახელმწიფო რწმუნებულის მოადგილე ალუდა თუთისანი მაშველების მიერ ლენტეხის მუნიციპალიტეტის მაღალმთიან სოფელ ცანას მკვიდრისთვის დახმარების ოპერაციას გამოეხმაურა.
„მეხანძრე-მაშველებმა გაიარეს 14 კილომეტრი, რომლის გავლას დასჭირდა, დაახლოებით, 10 საათი. ადგილზე მისულებს დახვდათ ძალიან კარგი სიტუაცია. აღნიშნული პიროვნება ჯანმრთელი, ცოცხალი და უვნებელი იყო.
მინდა ძალიან დიდი მადლობა გადავუხადო რაჭა-ლეჩხუმ ქვემო სვანეთის საგანგებო სამსახურს. განსაკუთრებული მადლობა მინდა გადავუხადო ლენტეხის სამაშველო სამსახურის ბიჭებს თავდაუზოგავი შრომისთვის“, – განაცხადა თუშისანმა.
ლენტეხის მუნიციპალიტეტის მაღალმთიან სოფელ ცანაში, სადაც ერთადერთი ადგილობრივი მაცხოვრებელია, რთული მეტეოროლოგიური პირობების მიუხედავად სამაშველო ჯგუფებმა ადგილზე ასვლა და მისი მონახულება შეძლეს. რამდენიმე დღის განმავლობაში ვერ ხერხდებოდა მასთან სატელეფონო კომუნიკაცია. 27 თებერვალს სამაშველო ჯგუფების წარმომადგენლებმა, მოახერხეს 14-კილომეტრიანი გზის ფეხით 10-საათში გავლა და შეძლეს პირადად მოენახულებინათ ცანის მკვიდრი ლაშა ნიჟარაძე.