აშშ ფასების შესამცირებლად თურქეთიდან და სამხრეთ კორეიდან მილიონობით კვერცხის იმპორტს გეგმავს. ინფორმაციას ამის შესახებ „ბიბისი“ ავრცელებს.
როგორც მედია წერს, ტრამპის ადმინისტრაცია გეგმავს კვერცხის იმპორტს თურქეთიდან და სამხრეთ კორეიდან და მოლაპარაკებებს აწარმოებს სხვა ქვეყნებთანაც, ამერიკელი მომხმარებლებისთვის ისტორიულად მაღალი ფასების შესამცირებლად.
„მოკლევადიან პერსპექტივაში ასობით მილიონ კვერცხზეა საუბარი“, – განაცხადა აშშ-ის სოფლის მეურნეობის მინისტრმა, ბრუკ როლინსმა თეთრ სახლში გამართულ პრესკონფერენციაზე.
როლინსმა აღნიშნა, რომ მისი დეპარტამენტი ასევე აწარმოებს მოლაპარაკებებს სხვა ქვეყნებთან ახალი მიწოდების წყაროების უზრუნველსაყოფად, თუმცა არ დაუკონკრეტებია, რომელ ქვეყნებზეა საუბარი.
„ჩვენი ქათმების პოპულაცია როდესაც აღდგება და კვერცხის წარმოების ინდუსტრია სრულად ამოქმედდება, იმედია რამდენიმე თვეში, მაშინ დავუბრუნდებით ჩვენს შიდა მწარმოებლებს და მათი კვერცხი მაღაზიის თაროებზე გამოჩნდება“, – აღნიშნა როლინსმა.
თებერვალში აშშ-ის სოფლის მეურნეობის დეპარტამენტმა წარმოადგინა ერთი მილიარდი დოლარის ღირებულების ხუთპუნქტიანი გეგმა კვერცხის ფასის დასარეგულირებლად. გემის მიხედვით, 500 მილიონი დოლარი გამოყოფილია ბიოუსაფრთხოების ზომებისთვის, დაახლოებით 100 მილიონი დოლარი ვაქცინის კვლევისა და განვითარებისთვის და 400 მილიონი დოლარი ფერმერთა ფინანსური დახმარების პროგრამებისთვის.
ცნობისთვის, აშშ-ში კვერცხის ფასები ტრამპის საპრეზიდენტო კამპანიის ერთ-ერთი მთავარი საკითხი იყო. ამ თვის დასაწყისში, აშშ-ის კონგრესში გამოსვლისას ტრამპმა ჯო ბაიდენი კვერცხის ფასების ზრდაში დაადანაშაულა.