თურქეთში დააკავეს ცხრა ჟურნალისტი, რომლებიც სტამბოლის მერის, ეკრემ იმამოღლუს დაკავების საწინააღმდეგო აქციებს აშუქებდნენ.
ამის შესახებ „როიტერი“ თურქეთის ჟურნალისტთა კავშირის ინფორმაციაზე დაყრდნობით წერს. დაკავებულ ჟურნალისტებს შორის არის „ფრანს პრესის“ ფოტოგრაფიც. ჟურნალისტების დაკავების კონკრეტული მიზეზი ჯერ უცნობია.
თურქეთის პრეზიდენტის, რეჯეფ თაიფ ერდოღანის მთავარი პოლიტიკური მეტოქე, სტამბოლის მერი ეკრემ იმამოღლუ კორუფციის ბრალდებით გასულ კვირას დააკავეს, რასაც ქვეყანაში საპროტესტო აქციები მოჰყვა. როგორც „როიტერი“ წერს, მიუხედავად იმისა, რომ ბევრ ქალაქში მასობრივი შეკრებები აკრძალულია, 23 მარტს მშვიდობიანი ანტისამთავრობო დემონსტრაციები მაინც გაიმართა.
ოპოზიციური „რესპუბლიკური სახალხო პარტია“ იმამოღლუს დაკავებას პოლიტიკურად მოტივირებულს უწოდებს და მოქალაქეებს დემონსტრაციებისკენ მოუწოდებს. მთავრობა ამ ბრალდებას უარყოფს.
სტამბოლის სარაჩანეს რაიონში, მუნიციპალიტეტის შენობის წინ გამართულ დემონსტრაციაზე სიტყვით გამოსვლისას „რესპუბლიკური სახალხო პარტიის“ ლიდერმა, ოზგურ ოზელმა განაცხადა, რომ ისინი გააგრძელებენ საპროტესტო აქციებს იმამოღლუს გათავისუფლებამდე.