ამერიკის შეერთებული შტატები და რუსეთი საუდის არაბეთის დედაქალაქ ერ-რიადში მიმდინარე მოლაპარაკებების ფარგლებში შავი ზღვის ინიციატივის საკითხს განიხილავენ, – განაცხადა რუსეთის პრეზიდენტის პრესმდივანმა, დიმიტრი პესკოვმა.
როგორც კრემლის პრესმდივანმა აღნიშნა, ინიციატივის მიზანი, შავ ზღვაში გემების უსაფრთხოების უზრუნველყოფაა, მოლაპარაკებებში მისი განხილვის შეთავაზება კი დონალდ ტრამპისგან მიიღეს.
დელეგაციებს შორის საუბარი ასევე შეეხება ენერგო-ინფრასტრუქტურის მიმართულებით ცეცხლის შეწყვეტის საკითხს.
„ჩვენ ამოვდივართ იქიდან, რომ დღეს დღის წესრიგში შავი ზღვის ინიციატივა და მის აღდგენასთან დაკავშირებული თემები დგას. ეს პრეზიდენტ ტრამპის წინადადება იყო, რაზეც პრეზიდენტმა პუტინმა თანხმობა განაცხადა. ამ მანდატით გაემგზავრა ჩვენი დელეგაცია ერ-რიადში“, – აღნიშნა პესკოვმა.
ცნობისთვის, დღეს ერ-რიადში რუსეთისა და აშშ-ის დელეგაციების მორიგი შეხვედრა მიმდინარეობს.
რუსულ დელეგაციას მოლაპარაკებებზე რუსეთის ფედერაციის საბჭოს საერთაშორისო ურთიერთობათა კომიტეტის თავმჯდომარე, გრიგორი კარასინი და რუსეთის უშიშროების ფედერალური სამსახურის დირექტორის მრჩეველი, სერგეი ბესედა წარმოადგენენ.