პირველი, ვინც ამით [ქვეყნის აყირავებით] იყო დაკავებული, ეს იყო USAID-ი და NED-ი – განაცხადა თბილისის მერმა და „ქართული ოცნების” გენერალურმა მდივანმა, კახა კალაძემ „ღამის კურიერის” ეთერში.
კალაძის თქმით, ეს ორი ორგანიზაცია ვერ აფინანსებს ქვეყნის შიგნით არეულობის მოწყობას, თუმცა არის სხვა წყაროები, რაზეც გამოძიება დაწყებულია.
„პირველი, ვინც ამით [ქვეყნის აყირავებით] იყო დაკავებული, ეს იყო USAID-ი და NED-ი. თქვენ იცით ამერიკის შეერთებული შტატების გადაწყვეტილება, განცხადება ამასთან დაკავშირებით, რომ ეს ორგანიზაციები სხვადასხვა ქვეყნებში დაკავებულები იყვნენ სახელმწიფო გადატრიალების დაფინანსებებში და მათ შორის საქართველო იყო მოხსენებული. რა თქმა უნდა, დაფინანსება შეჩერდა. ეს ორგანიზაციები ვერ აფინანსებენ იმას, რასაც წლების განმავლობაში აფინანსებდნენ. მარტივი მაგალითი მინდა მოვიყვანო – 2020 წლის საპარლამენტო არჩევნები, ვინ დააფინანსა პარალელური დათვლები. ეს იყო USAID-ი, რომელმაც ე.წ. პარალელური დათვლები დააფინანსა და რომელიც გააყალბა. ესეც უნდოდათ გამოეყენებინათ იმისთვის, რომ მოეწყოთ სახელმწიფო გადატრიალება, თითქოს ხელისუფლება არჩევნები გააყალბა. ამის ნიადაგზე უნდოდათ გადატრიალების მოწყობა. შემთხვევით, ირაკლი კობახიძემ და შალვა პაპუაშვილმა აღმოაჩინეს ეს ცდომილება და შეცდომა, რომელიც იყო მათ მიერ გამოქვეყნებულ დათვლებში. ჩვენი ჩართულობით და მოთხოვნით მოხდა ამ ყველაფრის გასწორება. რაც შეეხება დღევანდელ მოცემულობას, ეს ორი ორგანიზაცია ვერ აფინანსებს, მაგრამ არის სხვადასხვა წყაროები და ამასთან დაკავშირებით დაწყებულია გამოძიება. მე კიდევ ერთხელ მინდა გავიმეორო – არავის არ მივცემთ იმის საშუალებას, რომ ქვეყნის აყირავება შეძლოს”, – განაცხადა კახა კალაძემ.