როდესაც ისინი კვლავ გვესტუმრებიან და ეს მოხდება უახლოეს პერიოდში, ჩვენ საშუალება გვექნება, ვისაუბროთ, შემდგომში რა ფორმატში გავაგრძელოთ თანამშრომლობა, რა მიმართულებებითა და რა პრიორიტეტებზე გავაკეთოთ აქცენტი, – განაცხადა ამერიკიდან „დღის ქრონიკაში“ ჩართვისას ეროვნული ბანკის პრეზიდენტმა, ნათია თურნავამ.
მან აშშ-ში გამართული შეხვედრები შეაჯამა. მისივე თქმით, გამოქვეყნდა საერთაშორისო სავალუტო ფონდის პროგნოზი მსოფლიოს სხვადასხვა რეგიონის მიმართ და ამის მიხედვით ნათელია, რომ საქართველო არის მსოფლიოში ერთ-ერთი ყველაზე სწრაფად მზარდი ეკონომიკა. ეროვნული ბანკის პრეზიდენტმა სავალუტო ფონდის წარმომადგენლების საქართველოში სამომავლო ვიზიტზეც ისაუბრა.
„სავალუტო ფონდთან ჩვენი თანამშრომლობა არასდროს შეწყვეტილა. მიუხედავად იმისა, რომ პროგრამა შეჩერებული იყო. ჩვენ ფონდთან ერთად უამრავი ერთობლივი ტექნიკური დახმარების პროგრამა გვაქვს, რომელიც გვეხმარება ეროვნულ ბანკში სხვადასხვა აქტუალური მიმართულების წინ წაწევაში. მათი მისიებიც იმას ემსახურება, რომ უტყუარი ინფორმაცია ჰქონდეთ ჩვენს მაკროეკონომიკურ ვითარებაზე და სწორედ ამის საფუძველზე აქვეყნებს შემდეგ შეფასებებს – ჩვენი ბოლო შეფასება, როგორც ძალიან სწრაფად მზარდი ეკონომიკის, სწორედ მისიის მიერ ჩვენთან მონაცემების აკრეფის შედეგია.
როდესაც ისინი კვლავ გვესტუმრებიან და ეს მოხდება უახლოეს პერიოდში, ჩვენ საშუალება გვექნება, ვისაუბროთ, შემდგომში რა ფორმატში გავაგრძელოთ თანამშრომლობა, რა მიმართულებებითა და რა პრიორიტეტებზე გავაკეთოთ აქცენტი.
ჩვენ მიგვაჩნია და საერთაშორისო სავალუტო ფონდიც ამას აღიარებს და გვეთანხმება, რომ საქართველო მათთვის ყოველთვის არის და შეიძლება, იყოს, რეფორმებისა და ეკონომიკური განვითარების წარმატებული შემთხვევა, რადგან შესაშური მაკროეკონომიკური მაჩვენებლები გაგვაჩნია“, – განაცხადა თურნავამ.