საქართველოს დამოუკიდებლობის დღე ხონში განსაკუთრებულად აღინიშნა.
ხონის მუნიციპალიტეტის მერიის ინფორმაციით, მთელი დღის განმავლობაში, შემეცნებითი და გასართობი ღონისძიებები იმართებოდა. საზეიმოდ მოწყობილ ქალაქის ცენტრალურ მოედანზე განთავსებული იყო თემატური, ისტორიული კუთხეები და ბავშვთა გასართობი სივრცეები.
მოქალაქეებს შესაძლებლობა ჰქონდათ, გასცნობოდნენ თავდაცვის ძალების სამხედრო ტექნიკას, შეიარაღებასა და აღჭურვილობას.
სახელდახელოდ მოწყობილ სივრცეებში ადგილობრივი მეწარმეების პროდუქცია იყო წარმოდგენილი. ზუსტად 17:15 საათზე აჟღერდა საქართველოს ჰიმნი.
ადგილობრივებს საქართველოს დამოუკიდებლობის დღე მიულოცა ხონის მუნიციპალიტეტის მერმა ლადო ჯურხაძემ.
„გილოცავთ საქართველოს დამოუკიდებლობის დღეს. ეს დღე ყოველთვის უნდა გვახსოვდეს, რამეთუ 26 მაისს ჩვენ აღვნიშნავთ ჩვენი ქვეყნის სიძლიერეს, ჩვენი ენის, მამულისა და სარწმუნოების განმტკიცების დღეს. ერთიან, ძლიერ საქართველოში გვეცხოვროს. ჩვენი მემკვიდრეობა და ფასეულობები, ღირსეულად გადაგვეცეს მომავალი თაობებისათვის“, განაცხადა ჯურხაძემ.
დღის ბოლოს მოწვეული მუსიკალური ჯგუფების მიერ კონცერტი გაიმართა.
საქართველოს დამოუკიდებლობის დღისადმი მიძღვნილი ღონისძიება ხონში, საქართველოს ტურიზმის სააგენტოსა და ხონის მუნიციპალიტეტის მერიის ორგანიზებით გაიმართა.