საქართველოს პარლამენტის თავმჯდომარემ ირაკლი კობახიძემ გორში, დარბაზში შეკრებილებს სთხოვა, როგორი მიუღებელიც არ უნდა იყოს გამომსვლელის განცხადება, მშვიდად მოუსმინონ, ხოლო გამომსვლელებს სთხოვა, ნუ მოახდენენ საზოგადოების პროვოცირებას. ეს განცხადება პარლამენტის თავმჯდომარემ გორში, საკონსტიტუციო ცვლილებების პროექტის საყოველთაო-სახალხო განხილვაზე გააკეთა, როდესაც ”ევროპული საქართველოს” წევრის სერგო რატიანის გამოსვლას დარბაზში ხმაური და სიტყვიერი დაპირისპირება მოჰყვა.
”როგორი მიუღებელიც არ უნდა იყოს გამოსვლა, დღეს ვართ შეკრებილი იმისთვის, რომ კონსტიტუცია განვიხილოთ. მე მინდა გთხოვოთ, რომ თითოეულ გამომსვლელს მოუსმინოთ მშვიდად. ასევე, ხაზგასმით მინდა გამოსვლელელებს ვთხოვო, თვითონ ნუ მოახდენენ საზოგადოების პროვოცირებას”,- განაცხადა ირაკლი კობახიძემ.
პარლამენტის თავმჯდომარემ მიმართა დეპუტატ სერგო რატიანსაც.
”აქ იყო საუბარი პოლიტიკურ საკითხებზე ბატონო სერგო, ჩვენ კონსტიტუციაზე უნდა ვისაუბროთ. საუბარი იყო ისეთ თემებზე, რომელიც თქვენ არ უნდა გეხსენებინათ. ჩვენ არ დაგვიწყია აქ 9 წელზე საუბარი, ჩვენ ვსაუბრობთ კონსტიტუციასთან დაკავშირებით. არც 9 წელს გახსენებთ, არც ქუჩაში ხალხის დახოცვას, არც არაფერს, ჩვენ ვსაუბრობთ საქართველოს კონსტიტუციაზე.
ამიტომ, საზოგადოებას გთხოვთ, მშვიდად მოუსმინოთ ყველას და ასევე ყველა გამომსვლელს, ჩვენი ჩათვლით, ვთხოვ იმას, რომ პოლიტიკური გრძნობების პროვოცირება არ მოახდინოს, რაც ადამიანებს ძალიან მძიმე, შავნბელ წარსულს გაახსენებს”, – განაცხადა ირაკლი კობახიძემ.