სოსო ჯაჭვლიანს ჰქონდა გლდანელების პარტიის შექმნის იდეა, – ამის შესახებ საპარლამენტო უმრავლესობის დეპუტატმა ზაქარია ქუცნაშვილმა საკონსტიტუციო ცვლილებების პროექტის საყოველთაო -სახალხო განხილვისას საარჩევნო სისტემაზე საუბრისას განაცხადა.
”ჩვენი კონსტიტუციის თანახმად, რეგიონალური ნიშნით პარტიების შექმნა არ შეიძლება. საქართველოს გაერთიანების შემთხვევაშიც კი, არავის ექნება უფლება, რომ რეგიონალური პარტიები შექმნას. იმიტომ რომ არ შეიძლება, რომ ცხინვალის პარტია ცალკე, სოხუმის პარტია ცალკე, ბათუმის ცალკე და თიანეთის პარტია ცალკე არსებობდეს. პარტია უნდა იყოს ეროვნული მასშტაბის გაერთიანება. მაგ ლოგიკით გლდანელები შექმნიან პარტიას და ყველაზე ბევრნი არიან გლდანელები. მოუგებენ ყველას გლდანელები არჩევნებს. სოსო ჯაჭვლიანს ჰქონდა ეს იდეა გლდანელების პარტიის გაკეთების. აქედან გამომდინარე, თუ ვაცნობიერებთ, რომ რეგიონული ნიშნით პარტიის შექმნა არ შეიძლება, მაშინ მაჟორიტარული სისტემის გაუქმებით გზას ხომ არ ვუკეტავთ ინტეგრაციისკენ საქართველოს რეგიონებს? ამაზე მე ჩემს პოზიციას სამომავლოდაც დავაფიქსირებ და ვაპირებ, განხილვების დროს შერეული საარჩევენო სისტემის სასარგებლოდ გამოვთქვა ჩემი მოსაზრებები”, – განაცხადა ზაქარია ქუცნაშვილმა.