2025 წლის მაისში საქართველოს ეკონომიკა ინარჩუნებდა მდგრადი და სტაბილური განვითარების ვექტორს, რითაც უზრუნველყოფილი იქნა მისი ზრდა 7.5 პროცენტით (იანვარ-მაისში – 8.8 პროცენტით), რომელიც მნიშვნელოვნად აღემატება როგორც რეგიონის, ისე გლობალური მასშტაბით ზრდის შესაბამის ტემპებს. ინფლაციამ, რომელიც იანგარიშება 305 დასახელების საქონელ-წარმომადგენლის მიხედვით, 2025 წლის მაისში, წინა წლის მაისთან 3.5 პროცენტი შეადგინა. მაისის წლიური ინფლაცია აპრილისას აღემატება 0.1 პუნქტით. იმავე პერიოდში ინფლაციამ აშშ-ში მოიმატა ასევე 0.1 პუნქტით 2.4%), ხოლო EU27 -ში – პირიქით, შემცირდა 0.3 პუნქტით 1.9%) – წერს ეკონომისტი სოსო არჩვაძე სოციალურ ქსელში.
როგორც არჩვაძე აღნიშნავს, ეკონომიკის, ფულადი ტრანზაქციების, ექსპორტისა და რეექსპორტის ზრდა, ეროვნული ვალუტის მდგრადობა, დეპოზიტების ორნიშნა მატება, ლარიზაციის ზრდა და ინფლაციის დაბალი ტემპი წარმოაჩენს იმ პრეფერენციებს, რაც საქართველოს ეკონომიკას გლობალური კატაკლიზმების ფონზე პოზიტიურად გამოარჩევს და განაპირობებს მის გაძლიერებულ წარმოჩენას გლობალურ ეკონომიკაში.
„2025 წლის მაისში საქართველოს ეკონომიკა ინარჩუნებდა მდგრადი და სტაბილური განვითარების ვექტორს, რითაც უზრუნველყოფილი იქნა მისი ზრდა 7.5 პროცენტით (იანვარ-მაისში – 8.8 პროცენტით), რომელიც მნიშვნელოვნად აღემატება როგორც რეგიონის, ისე გლობალური მასშტაბით ზრდის შესაბამის ტემპებს.
ინფლაციამ, რომელიც იანგარიშება 305 დასახელების საქონელ-წარმომადგენლის მიხედვით, 2025 წლის მაისში, წინა წლის მაისთან 3.5 პროცენტი შეადგინა. მაისის წლიური ინფლაცია აპრილისას აღემატება 0.1 პუნქტით. იმავე პერიოდში ინფლაციამ აშშ-ში მოიმატა ასევე 0.1 პუნქტით 2.4%), ხოლო EU27 -ში – პირიქით, შემცირდა 0.3 პუნქტით 1.9%).
305 დასახელების საქონელ-წარმომადგენელიდან, რომელთა მიხედვითაც ხდება ინფლაციის გაანგარიშება, 2025 წლის მაისში წინა წლის შესაბამის პერიოდთან შედარებით ფასები შემცირდა 97-ზე, უცვლელი დარჩა 17, ხოლო გაიზარდა 191 დასახელების საქონელზე.
მაისში ყოველდღიურად ახლადრეგისტრირებულ საწარმოთა რაოდენობამ 206 ერთეული, ხოლო დღგ-ის გადამხდელ საწარმოთა ბრუნვამ – 14.7 მლრდ. ლარი (+13.0%) შეადგინა. აღნიშნული ბრუნვის მატების ტემპი მაისში 1.5-ჯერ აღემატებოდა წინა, აპრილის თვის ანალოგიურ მაჩვენებელს, ისევე როგორც ეკონომიკის საერთო ზრდის მაჩვენებელს (1.7-ჯერ), რაც ადასტურებს ბიზნესსექტორის მზარდ როლს საქართველოს ეკონომიკის განვითარებაში.
2025 წლის მაისში, ისევე როგორც აპრილში, საგარეო სავაჭრო ბრუნვის მთელი მატება +0.4%) უზრუნველყო ექსპორტის მატებამ +15.9%), მაშინ როდესაც იმპორტი შემცირდა 5.1 პროცენტით. ექსპორტის მატების ტემპი ფაქტობრივად 2-ჯერ აღემატებოდა საქართველოს ეკონომიკის მატების ტემპს, რაც ადასტურებს როგორც საქართველოს ეკონომიკის რეალური სექტორის და სატრანსპორტო-საკომუნიკაციო ფუნქციის მზარდ პოტენციალს, ისე სავაჭრო-ეკონომიკურ ექსპანსიას საქონლის გლობალურ ბაზრებზე.
მაისში ექსპორტის საშუალო სადღეღამისო მატება 2.6 მლნ. აშშ დოლარით აღემატებოდა წინა წლის მაისის ანალოგიურ მაჩვენებელს. აღნიშნულის შედეგად, ექსპორტით იმპორტის გადაფარვამ შეადგინა 43.3 პროცენტი, რაც წინა წლის ანალოგიურ მაჩვენებელზე 7.8 პუნქტით მეტია (2024 წ. მაისში – 35.5%).
მაისში საქართველოს ადგილობრივი ექსპორტი გაიზარდა 10.6 პროცენტით და 267.6 მლნ. აშშ დოლარი შეადგინა, რაც საუკეთესო მაჩვენებელია ბოლო 7 თვის მანძილზე (2024 წლის ოქტომბრის შემდეგ). მასზე მოდიოდა მთლიანი ექსპორტის მატების 32.5 პროცენტი. რეექსპორტი გაიზარდა – 20.5 პროცენტით, რაც, მაღალი საერთაშორისო ვოლატილობისა და გლობალურ ეკონომიკაში მზარდი ფრაგმენტაციის პირობებში, ადასტურებს საქართველოს გეოეკონომიკური ფუნქციის მზარდ და შეუქცევად მნიშვნელობას.
ექსპორტის, მათ შორის ადგილობრივი ექსპორტის საგრძნობი ზრდისა და სასაქონლო ნომენკლატურის გაფართოების პირობებში საქართველოს ექსპორტის წილი მის უშუალო სახმელეთო მეზობლებთან (აზერბაიჯანი, სომხეთი, თურქეთი, რუსეთის ფედერაცია) 2025 წლის მაისში წინა წლის მასთან შედარებით შემცირდა: მთლიან ექსპორტში – 40.8 პროცენტიდან 33.3 პროცენტამდე, ადგილობრივ ექსპორტში კი – 47.2 პროცენტიდან 40.1 პროცენტამდე. აღნიშნული, აგრეთვე ექსპორტში პირველ ადგილზე მყოფი მსუბუქი ავტომობილების (მთელი ექსპორტის 37.6%) ზრდის მაღალი ტემპი (+31.8%) ცალსახად და ერთმნიშვნელოვნად ადასტურებს საქართველოს საექსპორტო პოტენციალის ზრდასა და მის საგარეო სასაქონლო და ქვეყნისმიერი გეოგრაფიის გაფართოებას.
წლის პირველ ხუთ თვეში საქართველოს ნავთობისა და ნავთობპროდუქტების იმპორტის ერთეული ფასი შემცირდა 9 პროცენტით, ხოლო ბუნებრივი აირისა, პირიქით, გაიზარდა 1.5 პროცენტით. აღნიშნულის შედეგად 2024 წელთან შედარებით 2025 წელს, წელზე გადაანგარიშებით, ნავთობსა და ნავთობპროდუქტებზე ეკონომიამ 62 მლნ. აშშ დოლარზე მეტი შეადგინა, ხოლო ბუნებრივი აირის იმპორტზე გადახარჯვამ – დაახლოებით 4.5 მლნ. აშშ დოლარი.
ეკონომიკის ზრდაში აქტიურ როლს ასრულებს ტურისტული სექტორიც, იზრდება ტურისტების რაოდენობა საქართველოში და მათ მიერ გაწეული ხარჯები. ამასთან, ზრდას განაგრძობდა არა მარტო სხვა ქვეყნის რეზიდენტების ტურისტული ხარჯები საქართველოში, არამედ საქართველოს რეზიდენტების ტურისტული ხარჯებიც საზღვარგარეთ, რომელთა თანაფარდობა ადგილობრივი ტურიზმის ხარჯებთან ერთ წელიწადში გაიზარდა 8 პროცენტული პუნქტით – 58.2 პროცენტიდან 66.2 პროცენტამდე.
ეკონომიკური ზრდის კვალობაზე იზრდება დაქირავებულ მუშაკთა რაოდენობა და მათი შრომის ანაზღაურება. ეს უკანასკნელი რეალურ განზომილებაში (ინფლაციის გამორიცხვით) დაახლოებით 8 პროცენტით გაიზარდა. აღნიშნულის პარალელურად, გრძელდებოდა ანაზღაურებაში განათლების სფეროში საშუალო დონესთან ჩამორჩენის დაძლევის პროცესი (ერთ წელიწადში სხვაობაა თითქმის 4 პუნქტით შემცირდა – 42.1%-დან 38.2%-მდე).
2025 წლის მაისში უცხოეთიდან საქართველოში განხორციელებულმა ტრანზაქციებმა 317.2 მლნ. აშშ დოლარი (+11.6%), ხოლო წმინდა ტრანზაქციებმა – 282.2 მლნ. აშშ დოლარი (+11.0%) შეადგინა – ეს ყველაზე მაღალი მაჩვენებლებია ბოლო 23 თვის მანძილზე (2023 წლის ივნისის შემდეგ). აღნიშნული ზრდა მთლიანად რუსეთის გარდა დანარჩენი მსოფლიოდან ტრანზაქციების საგრძნობი, ორნიშნა ზრდის (+15.9%) დამსახურებაა. რუსეთის ფედერაციიდან ფულადი ტრანზაქციები განაგრძობდნენ შემცირებას (2025 წლის მაისში – 4.4 მლნ. აშშ დოლარით, ანუ 9.3%-ით), ისევე როგორც წილი ტრანზაქციების საერთო მოცულობაში (13.8%, ნაცვლად 2024 წლის მაისის 16.9%-სა).
საქართველოში განხორციელებული წმინდა ტრანზაქციების თითქმის 3/5 მოდის მრავალრიცხოვანი ქართული შრომითი მიგრანტებით ყველაზე გამორჩეულ 5 ქვეყანაზე (აშშ, იტალია, გერმანია, საბერძნეთი და ისრაელი). ამასთან, მხოლოდ მიმდინარე წლის იანვარ-მაისში აშშ-დან საქართველოში გადმოირიცხა თითქმის 1.5-ჯერ მეტი თანხა, ვიდრე რუსეთის ფედერაციიდან ($262.8 მლნ. vs. $177.2 მლნ. აშშ დოლარი), მაშინ როდესაც საქართველოდან რუსეთში გადარიცხულმა თანხამ იმავე პერიოდში 3.3-ჯერ გადააჭარბა საქართველოდან აშშ-ში განხორციელებული გზავნილების მოცულობას ($18.3 მლნ. vs. $5.6 მლნ.).
მაისში ლარის რამდენადმე გამყარებამ წინა თვესთან შედარებით ხელი შეუწყო საქართველოს საგარეო ვალის შემცირებას 69.7 მლნ. აშშ დოლარით (190.5 მლნ. ლარით), რაც საქართველოს თითქმის 8.4 ათასი შინამეურნეობის წლიური შემოსავლის ექვივალენტურია.
ეკონომიკის, საზღვარგარეთიდან შემოსული ფულადი ტრანზაქციების, ისევე როგორც ადგილობრივი ექსპორტისა და რეექსპორტის დინამიური ზრდა, ეროვნული ვალუტის მდგრადობა, საბანკო სექტორში დეპოზიტების ორნიშნა მატება და მათი ლარიზაციის ამაღლება, აგრეთვე ინფლაციის დაბალი ტემპი წარმოაჩენს იმ პრეფერენციებს, რაც პოზიტიურად გამოარჩევს საქართველოს ეროვნულ მეურნეობას მსოფლიოში მიმდინარე ეკონომიკური და პოლიტიკური კატაკლიზმების ფონზე, უზრუნველყოფს იმ შეუქცევად პროცესს, რაც უზრუნველყოფს საქართველოს უფრო აქტიურ და წონად სუბიექტად წარმოჩენას გლობალურ ეკონომიკაში“, – წერს არჩვაძე.