ყოფილი მთავარი პროკურორის ოთარ ფარცხალაძის ქონების შესწავლის საკითხზე სახელმწიფო აუდიტის სამსახურისთვის დოკუმენტაციის დამალვის ფაქტს თბილისის მერი დავით ნარმანია კატეგორიულად უარყოფს და გავრცელებულ ინფორმაციას ტყუილს უწოდებს.
“ველოდები აუდიტის სამსახურის მიერ გაკეთებულ დასკვნას, რომელიც გვაჩვენებს, თუ რაზე აკეთებენ შემმოწმებლები აქცენტს. ჩვენ მივაწოდეთ ყველა ინფორმაცია სჭირდებოდათ. ტყუილია, თითქოს ინფორმაცია დავმალეთ, ნებისმიერი დოკუმენტაცია, რომელიც მერიაში ინახება არის შემმოწმებლებისთვის ღია და რა დოკუმენტაიაც გვქონდა, მივეცით სახელმწიფო აუდიტის სამსახურის თანამშრომლებს”, – განაცხადა დავით ნარმანიამ.
მისივე თქმით, აღნიშნულთან დაკავშირებით ვრცელ კომენტარს აუდიტის დასკვნის გამოქვეყნების შემდეგ გააკეთებს.
სახელმწიფო აუდიტის სამსახურის ხელმძღვანელის ლაშა თორდიას განცხადებით, ოთარ ფარცხალაძის ქონების შესწავლის დროს თბილისის მერიამ აუდიტის სამსახურს გარკვეული სახის დოკუმენტაცია დაუმალა. საქმე ეხება, ფარცხალაძისთვის თბილისის მერიის მხრიდან მიწების უკანონოდ გადაცემის საქმეს.