ირაკლი კობახიძე – ჩვენი დღევანდელი ამოცანაა, რომ ჩამოვაყალიბოთ ძალიან მყარი დოკუმენტი და მყარი სისტემა

როგორი არასტაბილურიც იყო გასული 20 წლის განმავლობაში ჩვენი კონსტიტუცია, ისეთივე არასტაბილური სახით წარიმართა საქართველოში პოლიტიკური პროცესები, – ამის შესახებ პარლამენტის თავმჯდომარე ირაკლი კობახიძემ ბერლინში მიმდინარე კონფერენციაზე განაცხადა, სადაც საქართველოს კონსტიტუციაში შესატან ცვლილებებს განიხილავენ.
როგორც კობახიძემ სიტყვით გამოსვლისას განმარტა, კონსტიტუციის დოკუმენტმა მყარი საფუძველი უნდა ჩაუყაროს საქართველოში დემოკრატიული პროცესების განვითარებას.
„ჩემთვის დიდი პატივია, მონაწილეობა მივიღო კონფერენციის გახსნაში. მინდა მადლობა გადავუხადო ჩვენს გერმანელ კოლეგებს, პარტნიორებს დღევანდელი დღის ორგანიზებისთვის. ძალიან კარგი ტრადიციაა დამკვიდრებული, როდესაც საქმე ეხება საქართველოს კონსტიტუციის გადასინჯვას, იმართება ასეთი ტიპის ღონისძიებები საზღვარგარეთ, ძალიან მაღალი რანგის წარმომადგენლების მონაწილეობით. მოხარული ვარ, რომ ეს ტრადიცია გრძელდება და დღეს ბერლინში გვაქვს იმის შესაძლებლობა, რომ განვიხილოთ საქართველოს კონსტიტუციაში შესატანი ცვლილებების პროექტი.
საქმე ეხება ქვეყნის ძირითად კანონს, ეს არის ის დოკუმენტი, რომელმაც ძალიან მყარი საფუძველი უნდა ჩაუყაროს საქართველოში დემოკრატიული პროცესების განვითარებას. როგორიცაა ქვეყანაში კონსტიტუცია, ისეთია პოლიტიკური სისტემა, ისეთია პოლიტიკური პროცესები, რაც ქართულმა გამოცდილებამაც ძალიან კარგად დაგვანახა – როგორი არასტაბილურიც იყო გასული 20 წლის განმავლობაში ჩვენი კონსტიტუცია, ისეთივე არასტაბილური სახით წარიმართა საქართველოში პოლიტიკური პროცესები. ჩვენი დღევანდელი ამოცანაა, რომ ჩამოვაყალიბოთ ძალიან მყარი დოკუმენტი და მყარი სისტემა, რომელიც უზრუნველყოფს ჩვენ ქვეყანაში დემოკრატიული პროცესების გრძელვადიან განვითარებას“, – მიმართა ირაკლი კობახიძემ კონფერენციის მონაწილეებს.
საქართველოში მიმდინარე საკონსტიტუციო ცვლილებებზე ბერლინში კონფერენცია ცოტა ხნის წინ გაიხსნა. ვენეციის კომისიის მდივან თომას მარკერტს და ექსპერტებს, კონსტიტუციონალისტებს და არასამთავრობო ორგანიზაციების წარმომადგენლებს კონსტიტუციის კანონის პროექტს საქართველოს პარლამენტის თავმჯდომარე ირაკლი კობახიძე აცნობს.
კონფერენციას, რომელიც გერმანიის საერთაშორისო თანამშრომლობის საზოგადოების (GIZ) მხარდაჭერით იმართება, საქართველოს პარლამენტის წევრები: თამარ ჩუგოშვილი, მამუკა მდინარაძე, გიორგი კახიანი, გიორგი ლომია, სალომე სამადაშვილი, ზურაბ ჭიაბერაშვილი, პრეზიდენტის ადმინისტრაციის, საერთაშორისო და არასამთავრობო ორგანიზაციების წარმომადგენლები და ექსპერტები ესწრებიან.