ტურიზმის ეროვნული ადმინისტრაციის მარკეტინგული კამპანიის ფარგლებში, პოლონეთში, ვარშავაში საზოგადოებრივი ტრანსპორტი საქართველოს ტურისტული პოტენციალის ამსახველი ბანერებით დაიბრენდა, – ინფორმაციას ტურიზმის ეროვნული ადმინისტრაცია ავრცელებს.
„ვარშავაში 30 ავტობუსი საქართველოს ბუნების, ქალაქებისა და ტურისტული ადგილების ამსახველი ფოტოებით გაფორმდა. პოლონეთის გარდა საქართველოს ტურიზმის ეროვნული ადმინისტრაცია აქტიურ მარკეტინგულ კამპანიას ატარებს გერმანიაში, საფრანგეთსა და სკანდინავიის ქვეყნებში.
კამპანია მოიცავს როგორც გარე რეკლამას, ასევე სოციალურ ქსელებში აქტივობებს, ციფრულ და ბეჭდურ მედიაში სტატიებსა და ვიდეორგოლებს. ახალი მარკეტინგული კამპანიის მიზანია ევროკავშირის ქვეყნებში საქართველოს ცნობადობის ამაღლება და ტურისტული ნაკადების მოზიდვა“, – აღნიშნულია გავრცელებულ ინფორმაციაში.