გარემოს ეროვნულ სააგენტოში, პროექტის – „კლიმატის ცვლილებისადმი ადაპტაციის შესაძლებლობების გაძლიერება საქართველოში, ფაზა 2“ ფარგლებში, სამუშაო ვიზიტით საერთაშორისო ექსპერტი ენდრიუ კოსი იმყოფებოდა.
სააგენტოს ინფორმაციით, მოწვეულმა ექსპერტმა, ქობულეთის მუნიციპალიტეტში, სააგენტოს გეოლოგიის დეპარტამენტის სპეციალისტებით დაკომპლექტებული გეოლოგიური საფრთხეების შეფასების საველე ჯგუფებისთვის ტრენინგი გამართა თემაზე – „მეწყრის საფრთხის რუკების შექმნის მეთოდების პრაქტიკაში გამოყენება“. საველე სწავლებაში ადგილობრივი სპეციალისტების მონაწილეობა ქვეყანაში გეოლოგიური საფრთხეების შეფასების და მონიტორინგის მიმართულებით ცოდნის გაღრმავებას მნიშვნელოვნად შეუწყობს ხელს.
პროექტი „კლიმატის ცვლილებებისადმი ადაპტაციის შესაძლებლობების გაძლიერება საქართველოში, ფაზა 2“ დაფინანსებულია შვეიცარიის განვითარებისა და თანამშრომლობის სააგენტოს (SDC) მიერ.
ინიციატივა ფართომასშტაბიანი კლიმატური პროგრამის ნაწილია, რომელიც ხელს უწყობს კლიმატის ცვლილებით გამოწვეული კატასტროფების რისკის შემცირებას საქართველოში. პროგრამა ხორციელდება საქართველოს მთავრობისა და გაეროს განვითარების პროგრამის (UNDP) მიერ, კლიმატის მწვანე ფონდისა (GCF) და საქართველოს, შვედეთისა და შვეიცარიის დაფინანსებით.