აჭარაში, მაჭახელას ხეობაში ტრადიციული სახალხო დღესასწაული „მაჭახლობა“ გაიმართა.
ღონისძიებას აჭარის მთავრობის თავმჯდომარე სულხან თამაზაშვილი დაესწრო, რომელმაც ადგილობრივ მოსახლეობასა და სტუმრებს სახალხო დღესასწაული მიულოცა.
სიტყვით მიმართვისას სულხან თამაზაშვილმა აღნიშნა, რომ მთავრობა მაქსიმუმს გააკეთებს მაჭახელას ხეობის ტურისტული პოტენციალის სრულად ათვისებისთვის. ხეობაში დაწყებულია „ეთნოსოფლის“ პროექტი რომელიც გულისხმობს ისტორიული და ეთნოგრაფიული ძეგლების რეაბილიტაციას, ასევე სხვადასხვა ტურისტული ინფრასტრუქტურული პროექტის განხორციელებას.
„ულამაზეს მაჭახელას ხეობას უდიდესი ტურისტული პოტენციალი აქვს და ჩვენ ყველაფერს გავაკეთებთ იმისათვის, რომ ქართველმა და უცხოელმა სტუმრებმა უკეთ გაიცნონ ხეობის ისტორიული და ეთნოგრაფიული ძეგლები. როგორც მოგეხსენებათ, ხეობაში მიმდინარეობს „ეთნოსოფელის“ პროექტის განხორციელება, რომელიც მოიცავს საზოგადოებრივი ცენტრების მშენებლობას, ისტორიული და ეთნოგრაფიული ძეგლების რეაბილიტაციას, ასევე სხვადასხვა ტურისტული ინფრასტრუქტურული პროექტის განხორციელებას. ტრადიციების შენარჩუნებითა და ერთმანეთის სიყვარულით შევძლებთ, რომ მაჭახელა იქცეს გამორჩეულ ტურისტულ ლოკაციად, რაც გააუმჯობესებს ადგილობრივი მოსახლეობის სოციალურ და ეკონომიკურ მდგომარეობას,“ – განაცხადა მთავრობის თავმჯდომარემ.
დღესასწაულის ფარგლებში, გაიმართა „საპატიო მაჭახლელი 2025“-ის დაჯილდოება. მოეწყო კულტურული და სპორტული ღონისძიებები და ეთნობაზარი.
საღამო კონცერტით დასრულდა, რომელშიც ადგილობრივმა და მოწვეულმა შემსრულებლებმა მიიღეს მონაწილეობა.
ღონისძიებას აჭარის უმაღლესი საბჭოს თავმჯდომარე დავით გაბაიძე, აჭარის მთავრობის წევრები, ხელვაჩაურის მერი ზაზა დიასამიძე და დაცული ტერიტორიების სააგენტოს თავმჯდომარე ბესიკ ამირანაშვილი ესწრებოდნენ.
ინფორმაციას აჭარის ავტონომიური რესპუბლიკის მთავრობა ავრცელებს.