ამერიკის ელჩი იან კელი აზერბაიჯანელი ჟურნალისტის, აფგან მუხთარლის საქმეს მედიის წარმომადგენლებთან საუბრისას კვლავ გამოეხმაურა.
“ამერიკის საელჩოს აქვს მუდმივი და ახლო კონტაქტი საქართველოს მთავრობასთან და საქართველოს ხელისუფლება აცნობიერებს ამ საკითხის სერიოზულობას.
თქვენ ალბათ ყველამ იხილეთ სახელმწიფო დეპარტამენტის განცხადება ამ საკითხზე, რომლის მიხედვითაც დეპარტამენტი მოუწოდებს აზერბაიჯანს ამ პიროვნების გათავისუფლებისკენ. გარდა ამისა, მოუწოდებს საქართველოს მთავრობას, რომ ძალიან დეტალურად და სრულად გამოიძიოს ამ საქმის ირგვლივ არსებული გარემოებები”, – განაცხადა კელიმ.
აზერბაიჯანელი ჟურნალისტის, აფგან მუხთარლის ოჯახმა 29 მაისს განაცხადა, რომ მუხთარლი გაუჩინარდა. მოგვიანებით, გაირკვა, რომ ის ბაქოში, სახელმწიფო საზღვრის სამსახურის საგამოძიებო განყოფილებაში იმყოფებოდა. აზერბაიჯანის პროკურატურის განცხადებით, ჟურნალისტმა საზღვარი გამშვები პუნქტის გვერდის ავლით, პირადობის მოწმობის გარეშე გადაკვეთა.