სამხედრო ექსპერტი ტრისტან წითელაშვილი აფრიკაში ტყვედ ჩავარდნილი ქართველი მფრინავის სოსო ოსორაულის საქმესთან დაკავშირებით განცხადებას ავრცელებს:
„თითქმის უკვე ერთი თვეა ვმუშაობთ სამხედრო ექსპერტთა ჯგუფი კონგოში ტყვედ ჩავარდნილ პოლკოვნიკ სოსო ოსორაულის საქმესთან დაკავშირებით. დავით ნემსაძე ყოველ დღე აწვდიდა საზოგადოებას ინფორმაციას სოსო ოსორაულის ირგვლივ შექმნილ მდგომარეობაზე. ყველაფერს ვაკეთებთ, რომ ოსორაულის საქმე რომელიმე პოლიტიკურმა პარტიამ პოლიტიკურ ჩარჩოებში არ მოაქციოს. მაგრამ, „ნაციონალური მოძრაობა”, როგორც ყოველთვის, იმყოფება ჩასაფრებულის პოზიციაში და გიორგი ბარამიძის ხელმძღვანელობით, მცდელობა ჰქონდათ, ეს საქმე პოლიტიზირებული გაეხადათ.
11 ივნისს ბარამიძემ სცადა საგარეო საქმეთა სამინისტროსთან გამართულ აქციაზე მოეხდინა თემის პოლიტიზირება და თავისი ბინძური გეგმის განხორციელება. მაგრამ არაფერი გამოუვიდა, რადგან იქ ვიყავით სოსო ოსორაულის თანამებრძოლები და მისი ახლობლები.
მინდა, მივმართო სოსო ოსორაულის ახლობლებს, ნუ გავხდით ამ საქმეს პოლიტიზირებულს. საქართველოს ოფიციალური სტრუქტურები ყველაფერს აკეთებენ, რომ სოსო ოჯახს დაუბრუნდეს. ხოლო სოსოს საქართველოში არდაბრუნება დღეს მხოლოდ „ნაციონალურ მოძრაობას” და გიორგი ბარამიძეს აწყობს, რადგან როდესაც ბარამიძე იმყოფებოდა თავდაცვის მინისტრად, სოსომ მისი უკანონო ბრძანება არ შეასრულა კოდორის ხეობის დაბომბვის შესახებ, რაც გამოიწვევდა ბატალიონ „მონადირის” განადგურებას.
სოსომ ასევე კარგად იცის, თუ როგორ დაგეგმა მის სამხედრო ნაწილში სააკაშვილმა ოპერაცია „ენვერი”. სოსო უამრავი ინფორმაციის მატარებელი პიროვნებაა, „ნაციონალების” მიერ ჩადენილ დანაშაულებთან დაკავშირებით, რომელიც პროკურატურამ უნდა დაჰკითხოს მოწმის სტატუსით. სწორედ ამიტომ ცდილობს ბარამიძე ამ საქმის პოლიტიზირებას და საბოლოოდ იმას, რომ სოსო არ დაბრუნდეს საქართველოში.
მოვუწოდებ „ნაციონალებს” და ბარამიძეს, თქვენს ზონდერ ჯგუფებთან ერთად თავი დაანებეთ ამ საქმის პოლიტიზირებას, თორემ მეტ წინააღმდეგობას წააწყდებით, როგორც ეს იყო 11 ივნისს. კისრებს მოიტეხთ”, – ნათქვამია ტრისტან წითელაშვილის მიერ გავრცელებულ განცხადებაში.