უნდა დავაზუსტოთ, რომ CPT-ს დასკვნაში არ წერია, რომ მთლიანად პენიტენციური სისტემაა გადატვირთული. პირიქით, CPT-ს სტანდარტია, რომ 1 მსჯავრდებულზე 4 კვადრატული მეტრი უნდა იყოს უზრუნველყოფილი. ეს სტანდარტი დაცულია, რაც დასკვნაშიცაა აღნიშნულია, – განაცხადა იუსტიციის მინისტრის პირველმა მოადგილემ ბექა ძამაშვილმა „დღის ქრონიკაში“ ევროპის საბჭოს წამების, არაადამიანური და ღირსების შემლახველი მოპყრობისა თუ დასჯის პრევენციის ევროპული კომიტეტის (CPT) ანგარიშზე საუბრისას.
მან განმარტა, რომ ანგარიშში საუბარი იყო ცალკეული დაწესებულებების გადატვირთულობის ფაქტებზე, თუმცა ეს პრობლემა სხვადასხვა მექანიზმის გამოყენებით მყისიერად გვარდებოდა.
„პარალელურად ხდება ახალი, უფრო თანამედროვე, მცირე ტიპის პენიტენციური დაწესებულებების აშენება და ანგარიშში დადებითად არის მოხსენიებული ლაითურის ციხის გახსნა, რომელიც სრულად აკმაყოფილებს საერთაშორისო სტანდარტებს, როგორც პატიმრების საჭიროებების კუთხით, ასევე ჩვენი თანამშრომლების საჭიროებების კუთხით. თანდათანობით გაიხსნება მცირე ტიპის დაწესებულებები,, იმისთვის რომ პატიმრების დიდი რაოდენობის კონცენტრირება არ მოხდეს ერთ კონკრეტულ დაწესებულებაში. არის მუდმივი პროცესი, ამის შესახებ ინფორმაცია აქვს CPT-ს და რა თქმა უნდა ამ მიმართულებით მუშაობას გავაგრძელებთ“, – განაცხადა ძამაშვილმა.
წამების პრევენციის ევროპული კომიტეტის შეფასებით, საქართველოს ციხეებში არასათანადო მოპყრობის შემთხვევა არ დაფიქსირებულა.