ჩვენ დავიწყეთ ფასის შესწავლა პირველი წერტილიდან, ეს არის ადგილობრივი წარმოება, რადგან მიგვაჩნია, რომ ადგილობრივი წარმოება ჩვენი ეკონომიკის ფუნდამენტია, ჩვენთვის განსაკუთრებით მნიშვნელოვანია ადგილობრივი წარმოება იყოს კონკურენტული, ზუსტად გვესმოდეს რა ხარჯები აქვთ, ბიზნესპროცესები როგორ მიმდინარეობას, – განაცხადა გადაცემაში „იმედი Live” სასურსათო პროდუქციის, მედიკამენტებისა და საწვავის ფასწარმოქმნის სტრუქტურის შემსწავლელი საქართველოს პარლამენტის დროებითი კომისიის თავმჯდომარემ, შოთა ბერეკაშვილმა.
მისივე თქმით, კომისია უკვე შეხვდა დაახლოებით 30 ადგილობრივ მწარმოებელს, შეისწავლა მათი საოპერაციო და საწარმოო ხარჯები, ფინანსური სტაბილურობა.
„ამ სამმა შეხვედრამ გამოავლინა ის, რომ არსებობს მნიშვნელოვანი პრობლემები, რომელიც ფასწარმოქმნის ჯაჭვში დამატებით ხარჯს ქმნის. შედეგობრივად კი ვიღებთ იმას, რომ სამომხმარებლო კალათაში მომხმარებელი იღებს ძვირ პროდუქტს. კომპანიების თითქმის 100%-მა განაცხადა, რომ მათი წარმოება ნედლეულის ნაწილში დიდწილად დამოკიდებულია იმპორტულ ნედლეულზე. ეს იმას ნიშნავს, რომ მათ აქვთ იმპორტის ინფლაციის ნიშნები. პოზიტიური დინამიკა ის არის, რომ ბოლო სამი წლის განმავლობაში ლარის კურსი სტაბილურია, ასევე მნიშვნელოვანი იმპორტის ინფლაცია არ არის, ასეთ შემთხვევაში მწარმოებლებს მნიშვნელოვნად არ უძვირდებათ ამ ნაწილში პროდუქცია“, – განაცხადა ბერეკაშვილმა.
დროებითი კომისიის თავმჯდომარემ კიდევ ერთხელ განმარტა, რომ ეკონომიკის სამინისტროს პირველადი დასკვნით, საკვებ პროდუქტებზე და პირველადი მოხმარების პროდუქტებზე ფასნამატი 86%-ია.
„ეს ნიშნავს იმას, რომ წარმოების წერტილიდან ან საბაჟო პუნქტიდან სამომხმარებლო კალათამდე საშუალოდ პროდუქცია ძვირდება 86%-ით. ეს მაჩვენებელი უაღრესად მაღალია. სახეზეა სიტუაცია, როცა სტრუქტურულ პრობლემასთან გვაქვს საქმე და ჩვენი კომისიის მიზანია, რომ შეისწავლოს ფასწარმოქმნის ჯაჭვი“, – აღნიშნა შოთა ბერეკაშვილმა.