“არსებულ პრეზიდენტს არაფერი აქვს სადარდებელი, რადგან არც პირდაპირი და არც ირიბი წესით არავინ აირჩევს”

პოეტ დავით მაღრაძის განცხადებით, ამჟამინდელ პრეზიდენტ გიორგი მარგველაშვილს მომდევნო არჩევნებში მოსახლეობა არ აირჩევს.
მაღრაძის თქმით, პრეზიდენტს არაფერი აქვს სადარდებელი, მას არც პირდაპირი და არც ირიბი წესით არასდროს არავინ აირჩევს.
“ამ მხრივ, არსებულ პრეზიდენტს არაფერი აქვს სადარდებელი, რადგან არც პირდაპირი წესით აირჩევს არასდროს არავინ და არც ირიბი წესით. ჯერ ისეთი წესი არ მოგონილა, რომლითაც ამ პრეზიდენტს აირჩევს ვინმე”, – აღნიშნავს მაღრაძე.
დავით მაღრაძის თქმით, საკონსტიტუციო ცვლილებები აუცილებლობით იყო ნაკარნახევი.
“ცვლილებები ნაკარნახევი იყო აუცილებლობით, ვინაიდან 9 -წლიანი რეჟიმის ხელისუფლება – ვგულისხმობ წინა ხელისუფლებას – კონსტიტუციას ეპყრობოდა ძალიან უდიერად, მკერავთან ეგონათ თავი ალბათ და თავის სიმაღლეზე, სიგანეზე ირგებდნენ ამ კონსტიტუციას. რა თქმა უნდა, ცვლილებები საჭირო იყო, რადგან წინა ხელისუფლებამ დაამახინჯა ის. კონსტიტუცია ხომ არ არის მარტო ერთი ხელისუფლების დოკუმენტი?! ამიტომ, ცვლილებები შესატანი იყო. მაშინდელი ხელმძღვანელის მანიაკალურმა ვნებამ განაპირობა კონსტიტუციის ყველა მოსახვევში ცვლილება”,- განაცხადა მაღრაძემ.
მისივე თქმით, ის ეთანხმება კონსტიტუციაში შეტანილ ცვლილებებს.
“ვეთანხმები, ზოგადად, ოჯახის შესახებ ჩანაწერს, რომ ქალსა და მამაკაცს შორის არსებობს ოჯახის ცნება საქართველოში. შეიძლება, ზოგიერთი თვლიდეს, რომ ეს არ არის კონსტიტუციაში ჩასაწერი. ეს აღვირახსნილი კამპანია რომ არ იყოს მთელ სამყაროში და ძალადობას რომ არ ჰქონდეს ადგილი, გინდა თუ არა, ერთსქესიან ქორწინებას დაუჭიროს მხარი ყველამ, მაშინ შეიძლება, მართლაც არ ყოფილიყო ეს ჩანაწერი საჭირო, მაგრამ სახეზეა დიდი ტენდენცია, ნახარკახევი დიდი ქვეყნების ხელისუფლებებისგან, რომ ეს უნდა გახდეს სავალდებულო. ეს არის პასუხი ამაზე – ამ ძალადობრივ ტენდენციაზე, რომ საქართველოში ოჯახად ითვლება ქალსა და მამაკაცს შორის დამყარებული ჰარმონია. ამის ხაზგასმა, ვფიქრობ, ამ ძალადობრივი ტენდენციის ფონზე, ძალიან მართებული იყო. ჩვენ გვახსოვს ამერიკის წინა ხელისუფლების ხელმძღვანელი პირების განცხადებები, რომ მათ არ აინტერესებთ არანაირი ტრადიციები სხვა ქვეყნების, ვინც ამას არ მიიღებს, ის არის ველური, ამიტომაც, მე მიმაჩნია, რომ ამერიკელმა ხალხმა უარი უთხრა ასეთ გაბატონებულ ტენდენციებს და მიიღო, ჩემი აზრით, ძალინ ბრძნული გადაწყვეტილება პრეზიდენტ ტრამპის არჩევით”,- აღნიშნა მაღრაძე.