საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე გრიგორი კარასინის განცხადებებს პასუხობს.
„ამ საკითხებთან დაკავშირებით ჩვენ დიამეტრალურად განსხვავებული მიდგომები და ხედვა გვაქვს, მაგრამ არ მინდა დისკუსიაში შესვლა მასთან, რადგან ჩვენი ურთიერთობები სხვადასხვა საერთაშორისო ორგანიზაციებთან, ჩვენი საგარეო პოლიტიკის პრიორიტეტები, ორიენტირები – ეს არ არის ის თემა, რომელსაც ჩვენ პრაღაში განვიხილავთ, ეს ჩვენს მანდატს სცდება, ამიტომ არც დისკუსიის წარმოებას აქვს ამ შემთხვევაში გამართლება“, – განაცხადა ზურაბ აბაშიძემ.
კარასინის განცხადების იმ ნაწილს, სადაც რუსეთის საგარეო საქმეთა მინისტრის მოადგილე ამბობს, რომ „საქართველოს თანამშრომლობა ნატო-სთან ბოლო პერიოდში ისეთ ფორმებს იღებს, რომ ფაქტობრივად თბილისს ნატო-ს რუსეთის „შეკავების“ პოლიტიკის მონაწილედ ხდის“ აბაშიძე ასე პასუხობს:
“ცნობილია ჩვენი ურთიეთობა ნატო-სთან თუ სხვა საერთაშორისო ორგანიზაციებთან, ჩვენი სურვილი გაწევრიანებისა ევროსტრუქტურებში თუ ნატო-ში – ეს ჩვენი ქვეყნის არჩევანია, ეს ჩვენი ხალხის არჩევანია, აქ არანაირი კითხვები არ არსებობს ჩვენთვის. რუსეთის მხარეს შეიძლება ჰქონდეს კითხვები, ეს მათი პრეროგატივაა, რა ვქნათ“, – აცხადებს ზურაბ აბაშიძე.