“ჩვენ ჩვენი რეალობა და გამოწვევები გვაქვს და კონსტიტუციის არსებული ვერსია საუკეთესოდ მიესადაგება ამ ამოცანებს”

საპარლამენტო უმრავლესობის წევრი გიორგი მოსიძე საკონსტიტუციო ცვლილებებს აფასებს და ამბობს, რომ პარლამენტმა ის მესამე მოსმენით უნდა დაამტკიცოს.

დეპუტატი აღნიშნავს, რომ ვენეციის კომისიის რეკომენდაციები იდეალურთან ახლოსაა, თუმცა, მისივე აზრით, იდეალური არ არის ყოველთვის რეალური და პრაგმატული.

„ვენეციის კომისია ნამდვილად საპატივცემულო სტრუქტურაა, რომელიც გასცემს რეკომენდაციებს და ეს მისასალმებელია. თუმცა, უნდა აღინიშნოს ისიც, რომ ხშირ შემთხვევაში, იდეალური ყოველთვის არ არის რეალური და პრაგმატული. სწორედ ამიტომაა, რომ სახელმწიფოთა უმრავლესობა ცდილობს მაქსიმალურად გაითვალისწინოს კომისიის რეკომენდაციები, მაგრამ სახელმწიფოთა აბსოლუტურ უმრავლესობას ასევე არ გამოსდის ამ რეკომენდაციათა სრულად გათვალისწინება.
ჩვენ ჩვენი რეალობა და გამოწვევები გვაქვს და კონსტიტუციის არსებული ვერსია საუკეთესოდ მიესადაგება ამ ამოცანებს. შესაბამისად, კარგია, რომ მოვისმინეთ ყველა მხარის მოსაზრება და შეხედულებები, ასევე პროცესი იყო მაქსიმალურად გამჭვრივალე, განხილვებში ჩართულობა იყო ძალიან მაღალი, როგორც ქვეყნის შიგნით, ასევე საერთაშორისო დონეზე. ახლა კი საჭიროა დაწყებული საქმის დასრულება. მივმართავ პარლამენტის ხელმძღვანელობას, მოხდეს ცვლილებების მესამე მოსმენით დამტკიცება, რაც იქნება ნამდვილად წინგადადგმული ნაბიჯი და მივიღებთ კარგ კონსტიტუციას, რასაც ვენეციის კომისიის დასკვნაც ადასტურებს“,- აცხადებს უმრავლესობის წევრი გიორგი მოსიძე.