ტყიბულში მეწყრული პროცესების შედეგად დაზარალებულ მოსახლეობას ადგილობრივი და ცენტრალური ხელისუფლების წარმომადგენლები შეხვდნენ და მათ საჭიროებებს გაეცნენ. ასევე, ბოლო ინფორმაცია მიაწოდეს ადგილზე არსებული ვითარების შესახებ.
„მინდა უღრმესი მადლობა გამოვუცხადო ხელისუფლების წარმომადგენლებს, ასევე, საგანგებო სამსახურს იმიტომ, რომ უდიდესი წვლილია მათი იმაში, რომ დაზარალებული არავინ არის და ყველაფერი მშვიდობიანად დასრულდა. ხელისუფლების წარმომადგენლები დღეს შეგხვდნენ, მოგვცეს ამომწურავი ინფორმაცია ჩვენი საჭიროებების და თხოვნების შესახებ. პირველ რიგში გვაინტერესებდა ჩვენი სახლების მდგომარეობა. დაგვპირდნენ, რომ ეს საკითხი გადაჭრილი იქნება. ამიტომ მართლაც უღრმესი მადლობა მათ“, – განაცხადა ადგილობრივმა მკვიდრმა ნინო გოგოლაშვილმა.
45 ოჯახი ქუთაისსა და ტყიბულში მდებარე სასტუმროებშია გადაყვანილი. როგორც ხელისუფლების წარმომადგენლებმა მოსახლეობას განუმარტეს, ამ დროისთვის სოფელში გეოლოგები მუშაობენ.
სოფელ კურსებში მეწყერი კვლავ აქტიურია, რაც ტერიტორიაზე სპეციალისტების გადაადგილებას ართულებს.