ერგნეთში ინციდენტებისა და მათზე რეაგირების ფარგლებში მიმდინარე შეხვედრას შერიგებისა და სამოქალაქო საკითხებში სახელმწიფო მინისტრი ეხმაურება.
ქეთევან ციხელაშვილი ამბობს, რომ საოკუპაციო ხაზის გადმოწევას საქართველოს მოქალაქეების წინააღმდეგ მიმართული პროვოკაციაა, რომელსაც კონკრეტული ჯგუფები ახორციელებენ.
”ეს არის არა მცოცავი, არამედ ძალიან ღია და დინამიური ოკუპაციის პროცესი, რომელიც 2008 წლიდან მიმდინარეობს. სამწუხაროდ, საოკუპაციო ხაზის გასწვრივ, პერიოდულად ვაწყდებით ასეთ ინციდენტებს, როდესაც სხვადასხვა ბარიკადების აღმართვა ხდება. 2013 წელს ჩვენ შევძელით საერთაშორისო ძალისხმევის მობილიზებით, ჩვენი ძალიან დიდი ძალისხმევით ამ აქტიური პროცესის შეჩერება. მაგრამ ნებისმიერ მონაკვეთში, სადაც არ უნდა იყოს ეს, კავკასიონს ქედს მიღმა, სადაც გადის საქართველოს და რუსეთის საზღვარი, საქართველოს ტერიტორიაზე ნებისმიერი ფორმის დაბრკოლების აღმართვა არის ჩვენთვის მიუღებელი. რა თქმა უნდა, მთელი ჩვენი ძალისხმევა მიმართულია იმისაკენ, რომ ერთი მხრივ, მოხდეს ამგვარი ქმედებების პრევენცია და საბოლოო ჯამში, მავთულხლართების და სხვადასხვა მახინჯი ბარიკადების დემონტაჟი, რომელიც არა მხოლოდ უსაფრთხოების გამოწვევას ქმნის, არამედ, ადამიანებს უქმნის ყოველდღიურ ცხოვრებაში ძალიან დიდ პრობლემებს მიწაზე წვდომის, ოჯახებთან კონტაქტის და ა.შ.
დღეს იმართება ინციდენტების პრევენციისა და მათზე რეაგირების მექანიზმის მორიგი შეხვედრა ერგნეთში, ქართული მხარისათვის დღის წესრიგში მთავარი საკითხი გახლავთ სწორედ ამ ბანერის, ბანერების და სხვადასხვა უკანონო ფორტიფიკაციების აღმართვის საკითხი. რა თქმა უნდა, ჩვენ ამ საკითხს დავაყენებთ როგორც უსაფრთხოების ჭრილში, რამდენადაც ის წარმოადგენს გამოწვევას სტაბილურობისათვის და მშვიდობისათვის რეგიონში, ასევე ჰუმანიტარული თვალსაზრისით. ჩვენი ძალისხმევა მიმართულია, რომ არსებულ ვითარებაშიც კი, ვიდრე უფრო სტრატეგიული ამოცანების გადაწყვეტას შევძლებთ, მოსახლეობას მიეცეს საკუთარ მიწაზე წვდომა”, – განაცხადა ქეთევან ციხელაშვილმა.