„ჩვენ ვგმობთ ბორდერიზაციას და ნებისმიერ ნაბიჯს, რომელიც ბორდერიზაციისკენ იქნება გადადგმული,“ – ეს განცხადება საქართველოში ევროკავშირის წარმომადგენლობის ხელმძღვანელმა, იანოშ ჰერმანმა გააკეთა. ჰერმანი ერგნეთში მიმდინარე შეხვედრასაც გამოეხმაურა.
„სიტუაციის შესახებ ინფორმაციას ევროკავშირის სადამკვირვებლო მისიისგან ვიღებთ. ჩვენ ვგმობთ ბორდერიზაციისკენ გადადგმულ თითოეულ ნაბიჯს, რის გამოც დაბრკოლება ექმნება ამ ტერიტორიაზე მცხოვრებ მოსახლეობას და ეწინააღმდეგება კონფლიქტის მშვიდობიანი გზით მოგვარების რეზოლუციას. ეს საკითხი არის ინციდენტების პრევენციისა და მათზე რეაგირების მექანიზმის დღის წესრიგში, რომელშიც ევროკავშირიც ჩართულია.
სიტუაციის გათვალისწინებით, მინდა ხაზი გავუსვა იმას, რომ ევროკავშირი ყველგან აფიქსირებს საქართველოს ტერიტორიული მთლიანობისა და სუვერენიტეტის მიმართ მხარდაჭერას“, – განაცხადა იანოშ ჰერმანმა.