„ისტორიული შეთანხმებების პაკეტი გაფორმდა აზერბაიჯანის რესპუბლიკასთან საქართველოს პრემიერ-მინისტრის ვიზიტის ფარგლებში. ამას წინ უძღოდა მრავალთვიანი, საკმაოდ კომპლექსური და მნიშვნელოვანი მოლაპარაკებები. აღნიშნულ შეთანხმებებს უდიდესი მნიშვნელობა აქვს ჩვენი ქვეყნისთვის“, – განაცხადა ეკონომიკისა და მდგრადი განვითარების მინისტრმა მარიამ ქვრივიშვილმა, რომელმაც აზერბაიჯანში ვიზიტის შედეგები გადაცემა „იმედი LIVE“-ში შეაჯამა.
მარიამ ქვრივიშვილის ინფორმაციით, აზერბაიჯანთან შეთანხმების პაკეტი ორ ძირითად, ენერგეტიკის და ტრანსპორტის სექტორებს ფარავს. როგორც მინისტრმა აღნიშნა, აზერბაიჯანი ჩვენი ქვეყნისთვის სტრატეგიული, ეკონომიკური პარტნიორია, განსაკუთრებით ენერგეტიკის სექტორში.
„სწორედ აქედან გამომდინარე არის უმნიშვნელოვანესი, რომ მრავალთვიანმა, ძალიან მეგობრულმა, პარტნიორულმა მოლაპარაკებამ ნაყოფიერი შედეგი გამოიღო და წარმატებით დასრულდა. რა თქმა უნდა, უდიდესი როლი ჰქონდა ამ მოლაპარაკებების მიმდინარეობისას პრეზიდენტ ალიევის ვიზიტს საქართველოში, მის შეხვედრას „ქართული ოცნების“ საპატიო თავმჯდომარესთან, ბატონ ბიძინა ივანიშვილთან. რა თქმა უნდა, ორმხრივი შეხვედრები გაიმართა საქართველოს პრემიერ-მინისტრ ირაკლი კობახიძესთან. მოკლედ რომ შევაჯამო, ეს იყო მრავალთვიანი კომპლექსური მოლაპარაკება. ჩვენი გუნდი ძალიან აქტიურად აწარმოებდა მოლაპარაკებებს და ამან კიდევ ერთხელ, თვალნათლივ გამოაჩინა, თუ რაოდენ კეთილმეზობლური და მეგობრული ურთიერთობები გვაკავშირებს აზერბაიჯანთან“, – აღნიშნა ეკონომიკისა და მდგრადი განვითარების მინისტრმა.
ამასთან, მარიამ ქვრივიშვილის შეფასებით, სწორედ ამ შედეგით, მორიგ ჯერზე საქართველოს ხელისუფლების პოლიტიკურმა გუნდმა მოსახლეობას კიდევ ერთხელ საქმით აჩვენა, რომ მისი თითოეული ქმედება და დასახული ამოცანები ყოველთვის მიმართულია ქვეყნის მოქალაქეების კეთილდღეობაზე, კონკრეტული ინდუსტრიების გაძლიერებაზე.