ქართულმა მხარემ უკრაინას სააკაშვილის ექსტრადაციის შესახებ ჯერ კიდევ მაშინ მიმართა, როდესაც ექსპრეზიდენტს საქართველოს მოქალაქეობა ჰქონდა, თუმცა უკრაინამ უარი განაცხადა – შესაბამისი კომენტარი უმრავლესობის დეპუტატმა ეკა ბესელიამ ჟურნალისტებთან საუბრისას გააკეთა.
“პირველი ეტაპი იყო ის, როდესაც სააკაშვილს ჯერ კიდევ არ ჰქონდა ნათქვამი უარი საქართველოს მოქალაქეობაზე, განხორციელდა გადმოცემის მოთხოვნა საქართველოს შესაბამისი ორგანოების მხრიდან, მაგრამ იმ ეტაპზე ის დადებითად ვერ გადაწყდა. ამის გაგრძელება იყო სასამართლო პროცესები, რომლებიც ახლაც მიმდინარეობს. ქართული მართლმსაჯულების მიერ სააკაშვილს შეფარდებული აქვს წინასწარი პატიმრობა და ამ ეტაპზე რამდენიმე ეპიზოდზე აქვს წაყენებული ბრალი. შესაბამისად, წინ არის ჯერ კიდევ სასამართლო გადაწყვეტილება. მესამე მნიშვნელოვანი გარემოება არის ის, რომ მან უარი თქვა საქართველოს მოქალაქეობაზე და დღეს უკრაინის მოქალაქეობა აქვს, შესაბამისად უკრაინის კანონმდებლობითა და კონსტიტუციით გადაცემის საკითხი წყდება კონსტიტუციის ჩანაწერის თანახმად და აქ უკვე არის განსხვავებული პოლიტიკური და სამართლებრივი მოცემულობა”, – განაცხადა ეკა ბესელიამ.