ენგურჰესის თაღოვანი კაშხლის მიმდებარე ტერიტორია ტურისტული ზონა ხდება. პროექტის პრეზენტაცია ამ წუთებში მიმდინარეობს. პრემიერ-მინისტრის განცხადებით, ენგურჰესის პროექტის ანალოგი მხოლოდ კალიფორნიის შტატშია – ჰუვერის ჰიდროელექტროსადგური, სადაც ასევე მნიშვნელოვანი ტურისტული კომპლექსია.
პრემიერის განცხადებით, ენგურჰესის ტურისტული ზონის მოწყობის პროცესში მუდმივად იქნება დასაქმებული 200-მდე ადამიანი, პრიორიტეტი კი ადგილობრივ მოსახლეობას მიენიჭება.
“ჩვენს ქვეყანას შეემატება ძალიან მასშტაბური, მრავალფუნქციური ტურისტული ზონა – ენგურჰესის ტურისტული ცენტრი, რომელიც მსოფლიო დონის ატრაქცია გახდება და ეს არ არის მხოლოდ ხმამაღალი სიტყვა, ეს არის რეალობა. დარწმუნებული ვარ, თავისი უნიკალურობიდან გამომდინარე, ენგურჰესის ტურისტული ცენტრი ნამდვილად იქცევა საქართველოს სავიზიტო ბარათი. დღევანდელი მსოფლიო უდიდეს ყურადღებას უთმობს ინდუსტრიული ძეგლების დაცვას და გადარჩენას. სწორედ ამ პროექტის ხორცშესხმით დღეს, საშუალება გვეძლევა, ჩვენც მოვუაროთ და შევინარჩუნოთ ჩვენი ინდუსტრიული მემკვიდრეობა და მეტიც, ღირსშესანიშნაობად ვაქციოთ იგი. საბედნიეროდ, დღეს ჩვენ გვაქვს უნიკალური ენგურჰესის შენობა, რომლის თაღოვანი კაშხალი სიდიდით მეორეა მსოფლიოში. შესაბამისად, ნამდვილად იმსახურებს ინდუსტრიული და კულტურული მემკვიდრეობის სტატუსს.
ტურისტურლი ინფრასტრუქტურა 157 ჰექტარზე იქნება გაშლილი. მოეწყობა შემეცნებითი და აღმოჩენათა ცენტრი, სამუზეუმო საინფორმაციო ცენტრი, საბაგირო გზა, ღია საკონფერენციო სივრცეები, სანაოსნო ინფრასტრუქტურა, იქნება მსოფლიოში ყველაზე მაღალი, 280 მეტრიანი ლიფტი, მდინარე ენგურზე გადასახედები, ასევე იქნება კომპონენტები ექსტრიმის მოყვარულთათვის. ჩვენ უკვე გვაქვს სტრატეგია, რომელიც ევროპის წამყვან კომპანიებთან, “კოკო არქიტექსტათან” და გამოცდილ ესტონელ სპეციალისტებთან ერთად შემუშავდა.
პროექტის მომზადებას დასჭირდება 1 წელი, რის შემდეგაც დაიწყება უკვე სამშენებლო ინფრასტრუქტურული სამუშაოები და რამდენიმე წელიწადში მთლიანად პროექტირება და მშენებლობა ერთად მოიცავს 5 წელს. ჩვენ გვექნება დასრულებული უმაღლესი დონის ტურისტული ინფრასტრუქტურა, რომელიც იქნება სახელმწიფოსა და კერძო სექტორს შორის პარტნიორობის ძალიან მნიშვნელოვანი ნიმუში.
წინასწარი გათვლებით, ეს ტურისტული ზონა საკმაოდ შემოსავლიანი იქნება და წელიწადში 400 ათასამდე ტურისტს მიიღებს“, – განაცხადა პრემიერმა.