მმართველი გუნდი ოპოზიციასთან კონსულტაციების სავარაუდო თარიღს ასახელებს. საპარლამენტო უმრავლესობის წევრის, გია ვოლსკის განცხადებით, საკოორდინაციო საბჭოსთან შეხვედრა მომდევნო კვირის შუა დღეებში გაიმართება, თუმცა უცნობია რა ფორმატით შედგება შეხვედრა.
როგორც ვიცე-სპიკერმა განმარტა, უმრავლესობაში ფორმატზე მსჯელობა ამ დრომდე მიმდინარეობს.
უმრავლესობაში უკვე ასახელებენ იმ საკითხებს, რომლებზეც მმართველი გუნდის პოზიცია არ შეიცვლება. გია ვოლსკის თქმით, ეს საკითხებია: 2020 წლის საპარლამენტო არჩევნების ჩატარების წესი, ქორწინებისა და მიწის საკითხი.
ამასთან, უცვლელი დარჩება პრეზიდენტის არჩევის წესზე მიღებული გადაწყვეტილებაც. ვიცე-სპიკერის განცხადებით, ამ ეტაპზე ოპოზიციის მხრიდან საკითხების კონკრეტულ ჩამონათვალს ელიან, თუმცა უმრავლესობაში ფიქრობენ, რომ შესაძლოა, ბლოკებსა და ბარიერზე იმსჯელონ, ასევე განსახილველ საკითხებში იქნება უშიშროების საბჭო და კრიზისების მართვა.
საპარლამენტო უმრავლესობა “ქართული ოცნების” ოფისში სხდომას მართავს. სხვა საკითხებთან ერთად საკონსტიტუციო ცვლილებებზე ოპოზიციასთან კონსულტაციების შესაძლო ფორმატებს განიხილავენ.