გია აბაშიძე სოციალურ ქსელში პოსტს აქვეყნებს.
”❓რატომ დატოვა მანანა კობახიძემ საკონსტიტუციო სასამართლოს მოსამართლის თანამდებობა? „ქართული ოცნების“ ერთ-ერთი თანადამფუძნებლის ეს გადაწყვეტილება მხოლოდ კონკრეტულ საქმეზე უთანხმოებას უკავშირდება თუ მოსალოდნელი საერთაშორისო სანქციების შიშსაც? ამას მისი შემდგომი ნაბიჯები გვიჩვენებს.
თუ მანანა კობახიძე რადიკალური მედიისთვის სასურველ რესპონდენტად იქცევა ან უსაფუძვლო კრიტიკული განცხადებების „ცხობას“ დაიწყებს, ბევრი რამ გაირკვევა. ხოლო თუ მისი გადაწყვეტილების მიზეზი მართლაც სანქციების შიში იყო, ლოგიკურად ჩნდება კითხვა: მაშინ ხელისუფლების სხვა წარმომადგენლები რატომ არ უშინდებიან სანქციებს?
ამ ეტაპზე მანანა კობახიძის გადაწყვეტილების შეფასება ნაადრევია — მისი რეალური მიზეზები ჯერ უცნობია. თუმცა, „ქართული ოცნების“ მრავალწლიან პოლიტიკურ ისტორიაში გუნდიდან წასვლისა და ყოფილი თანამებრძოლების წინააღმდეგ მოქმედების არაერთი შემთხვევა გვახსოვს. სამწუხაროდ, ზოგს მსგავსი რამ საკუთარ ოჯახსა თუ საახლობლოშიც უფრო მწარედ გამოუცდია.
⚖️ რა უძღოდა წინ გადადგომას?
13 ოქტომბერს მანანა კობახიძეს, პირადი განცხადების საფუძველზე, საკონსტიტუციო სასამართლოს მოსამართლის უფლებამოსილება ვადაზე ადრე შეუწყდა. მის ათწლიან უფლებამოსილების ვადას 2027 წლის თებერვალში ეწურებოდა.
9 ოქტომბერს კობახიძემ მოითხოვა, არ მიეღო მონაწილეობა ხუთი ოპოზიციური პარტიის აკრძალვის შესახებ სარჩელის განხილვაში. მიზეზად საკუთარი პოლიტიკური წარსული დაასახელა: ის „ქართული ოცნების“ დამფუძნებელი წევრი და პარტიის პირველი თავმჯდომარე იყო, მოგვიანებით კი მე-8 და მე-9 მოწვევის პარლამენტების დეპუტატი გახდა. ამ პერიოდში აქტიურად აკრიტიკებდა „ნაციონალურ მოძრაობას“ და საჯაროდ მოითხოვდა პარტიის დაშლასა და პოლიტიკური ველიდან მის წასვლას.
კობახიძის განმარტებით, მოსამართლედ არჩევისა და ფიცის დადების შემდეგ იგი კონსტიტუციის შესაბამისად მოქმედებდა და წარსული პოლიტიკური განცხადებები მის მიუკერძოებლობაზე გავლენას ვერ მოახდენდა. ამასთან, თავადვე აღიარებდა, რომ ამ განცხადებებს საზოგადოებასა და საქმის მონაწილეებში მისი მიუკერძოებლობის მიმართ გონივრული ეჭვის გაჩენა შეეძლო.
🔹 რა თქვა პრემიერმა?*
12 ოქტომბერს პრემიერ-მინისტრმა ირაკლი კობახიძემ განაცხადა:
„თავის დროზე, პარტიის დამფუძნებლობა არ არის საფუძველი აცილებისთვის. ასე საერთოდ არცერთი კანონი არ უნდა განიხილოს მანანა კობახიძემ.“
პრემიერის თქმით, მანანა კობახიძე უკვე მეათე წელია მოსამართლეა და კონკრეტულ პოლიტიკურ პარტიასთან შეხება აღარ აქვს.
🔹 როგორ დასრულდა დავა?
საკონსტიტუციო სასამართლომ მანანა კობახიძის თვითგანრიდების მოთხოვნა არ დააკმაყოფილა. კობახიძემ და მოსამართლე ევა გოცირიძემ განსხვავებული აზრი დააფიქსირეს. მომდევნო დღეს კი მან თანამდებობა დატოვა.
❗ მანანა კობახიძის გადადგომის ზუსტი პირადი მოტივი ოფიციალურად განმარტებული ჯერ არ არის. ამიტომ გადამწყვეტი მისი შემდგომი ნაბიჯები იქნება: გამოჩნდება, ეს კონკრეტულ საქმეზე სასამართლოსთან უთანხმოებით ამოიწურა თუ მის გადაწყვეტილებას სხვა მიზეზებიც ჰქონდა.”
