ეკა ბესელია – ეს არის იუმორისტული ჟანრი

„გამოქვეყნებული ჩანაწერი არ არის ის თემა, რომელიც შეიძლება იყო სერიოზული განსჯის საკითხი. ეს არის იუმორისტული ჟანრი“ – ამ სიტყვებით ეხმაურება საპარლამენტო უმრავლესობის ერთ-ერთი ლიდერი ეკა ბესელია Страна.ua-ს მიერ გავრცელებულ ჩანაწერს.
ეკა ბესელიას მიაჩნია, რომ გამოქვეყნებული ჩანაწერი იუმორისტული „ასეთი შოუს და იუმორისტული სკეტჩის ეპიზოდებით შეიძლება დაკავდეს ნებისმიერი ადამიანი, მაგრამ ეს არ არის თემა, რომლის სერიოზული პოლიტიკური განხილვა შეიძლება მოხდეს. ეს არის ჩემი კომენტარი. მე ამას არანაირ სერიოზულ მნიშვნელობას არ ვანიჭებ და ბუნებრივია, არც მის ავთენტურობაზე არ და ვერც ვისაუბრებ”, – განაცხადა ბესელიამ.
რაც შეეხება ოპოზიციის განცხადებებს, რომ გამოქვეყნებულ ჩანაწერს ექსპერტიზა უნდა ჩაუტარდეს, ბესელია ოპონენტებს ურჩევს, საარჩევნო კამპანიის დროს დაკავდნენ უფრო სერიოზული თემებით, როგორიცაა საარჩევნო პროცესი და თავიანთი შესაძლებლობები მიმართონ უფრო სერიოზული საკითხებისკენ.
შეგახსენებთ, რომ Страна.ua-მ გაავრცელა აუდიოჩანაწერი, რომელშიც, ცნობილი რუსი ,,პრანკერი“ ლექსუსი თითქოსდა საქართველოს შს მინისტრ გიორგი მღებრიშვილს, უკრაინის შს მინისტრ არსენ ავაკოვის სახელით, ექსპრეზიდენტ მიხეილ სააკაშვილის ექსტრადიციის საკითხზე ესაუბრება. გიორგი მღებრიშვილი ექსპრეზიდენტს უცენზურო სიტყვებით მოიხსენიებს და უკრაინულ მხარეს სთხოვს, არ გადმოსცენ ის საქართველოს. ამასთან, ის ამბობს, რომ ეს პოზიცია პრემიერ-მინისტრ გიორგი კვირიკაშვილთან შეთანხმებულია. საქართველოს შინაგან საქმეთა სამინისტრომ უარყო, რომ მსგავსი საუბარი შედგა.