განსაკუთრებულ მადლობას გიორგი კვირიკაშვილს ვუხდი, რომელიც პირველივე წუთებიდან ხანძრის სალიკვიდაციო ღონისძიებებში იყო ჩართული, – ამის შესახებ „ქართული ოცნების“ თბილისის მერობის კანდიდატმა კახა კალაძემ საარჩევნო შტაბის გახსნაზე სიტყვით გამოსვლისას განაცხადა.
კახი კალაძემ საარჩევნო შტაბის ოფიციალურ გახსნაზე სიტყვით გამოსვლა ბორჯომის ხეობაში განვითარებული პროცესებით დაიწყო და მადლობა გადაუხადა მაშველებს, ჯარისკაცებს, პოლიციელებს, ასევე საქართველოს მეგობარ ქვეყნებს.
„განსაკუთრებულ მადლობას გიორგი კვირიკაშვილს ვუხდი, რომელიც პირველივე წუთებიდან ხანძრის სალიკვიდაციო ღონისძიებებში იყო ჩართული. ეს ნათელი მაგალითია იმისა, რომ ერთად დგომით ყველაფერი შესაძლებელია“, – აღნიშნა კალაძემ.
კახი კალაძის თქმით, მისთვის თბილისის მერობის კანდიდატად დასახელება ძალიან დიდი პატივი და უდიდესი პასუხისმგებლობაა.
„ძალიან კარგად მაქვს გააზრებული და გათვითცნობიერებული თუ რას ნიშნავს, იყო თბილისის მერი. სახელისუფლებო გუნდის პოლიტიკური მხარდაჭერით შევძლებთ, თბილისის გამოწვევებთან გამკლავებას. მადლობა თბილისელებს იმისათვის, რომ მათ მხარდაჭერას და თანადგომას ვგრძნობ. გამოცხადებული ნდობა ძალას მაძლევს, რომ ნებისმიერი გამოწვევა გადავლახო, ჩვენი ქალაქის, ჩვენი ქვეყნის განვითარებაში საკუთარი წვლილი შევიტანო. ჩვენ ერთად ყოველთვის გავიმარჯვებთ, თბილისი გაიმარჯვებს. ძალიან კარგად ვიცით და ყველა ის პრობლემა გვესმის, რაც თბილისსა და თბილისელებს აწუხებთ. ასევე კარგად ვიცით, ეს პრობლემები როგორ მოვაგვაროთ. ბოლო წლების განმავლობაში ბევრი რამ გაკეთდა, მაგრამ საზოგადოება ვითარდება და ჩვენც ბევრად უფრო მეტი გვინდა. თითოეული თბილისელისთვის ვიშრომებ, არ დავიღლები მუშაობით, არ დავიღლები იმით, ვემსახურო თბილისს და თბილისელებს“, – დასძინა კალაძემ.