“ქართული ოცნება – დემოკრატიული საქართველოს” თბილისის მერობის კანდიდატმა კახა კალაძემ მთაწმინდის რაიონის მოსახლეობასთან შეხვედრა გამართა და მთაწმინდის რაიონის მაჟორიტარობის კანდიდატი ჯაბა ჯიშკარიანი წარუდგინა.
მაჟორიტარი კანდიდატის წარდგენას საკანონმდებლო და აღმასრულებელი ხელისუფლების წარმომადგენლები ესწრებოდნენ.
კახა კალაძის განცხადებით, მან კარგად იცის ყველა ის პრობლემა, რაც მთაწმინდის მოსახლეობას აწუხებს და ყველა პრობლემის მოგვარება გამარჯვებისთანავე დაიწყება.
მან შეკრებილ მოსახლეობას მხარდაჭერისთვის მადლობა გადაუხადა და აღნიშნა, რომ ჯაბა ჯიშკარიანი არის ის ადამიანი, რომელიც ღირსეულად წარმოადგენს საზოგადოების ინტერესს დედაქალაქის საკრებულოში.
“მე კარგად ვიცი ყველა ის პრობლემა, რომელიც მთაწმინდის რაიონს აწუხებს. ჩემს გუნდთან ერთად მაჟორიტართან ერთად, პირველივე დღიდან დავიწყებთ იმ პრობლემების ძირეულ მოგვარებას, რომელიც ამ რაიონს და რაიონის მცხოვრებლებს აქვთ. ჩვენ საკმაოდ ამბიციური გეგმა გვაქვს ძველი თბილისის განვითარების, ეს იქნება ახალი სტიმული, ახალი სიცოცხლე ძველი თბილისისთვის. მე კარგად ვიცი ავარიული სახლების პრობლემა, კომუნიკაციების მიმართულებით არსებული პრობლემები და მინდა გითხრათ, რომ ეს ყველაფერი მოგვარებადია. ჩვენს კანდიდატს სჭირდება თქვენი მხარდაჭერა და მჯერა, რომ ის იქნება ღირსეული წარმომადგენელი მთაწმინდის რაიონის”, – აღნიშნა სიტყვით გამოსვლისას კახა კალაძემ.
თავის მხრივ შეკრებილ მოსახლეობას მხარდაჭერისთვის მადლობა გადაუხადა „ქართული ოცნების” მთაწმინდის მაჟორიტარი დეპუტატობის კანდიდატმა ჯაბა ჯიშკარიანმა. მისი განცხადებით, 4 წლის განმავლობათში მოხდა არსებული პრობლემების დეტალური აღწერა და დამუშავება, ხოლო გამარჯვების შემთხვევაში მოხდება ყველა იმ ძირითადი პრობლემების მოგვარება, რაც მითაწმინდის რაიონის მოსახლეობას წლებია აწუხებს.