საქართველოს ოთხდღიანი ოფიციალური ვიზიტით ამერიკის შეერთებული შტატების სამხედრო-საზღვაო ძალების წარმომადგენლები ეწვივნენ – აშშ-ს კუთვნილი ხომალდი OAK HILL (LSD-51) ბათუმის ნავსადგურში დღეს შემოვიდა, – ამის შესახებ შინაგან საქმეთა სამინისტრო იტყობინება.
„ვიზიტის ფარგლებში ხომალდის ეკიპაჟის წარმომადგენლები შინაგან საქმეთა სამინისტროს სასაზღვრო პოლიციის სანაპირო დაცვის დეპარტამენტის ხელმძღვანელებს შეხვდნენ. ასევე გაიმართა შეხვედრა აჭარის ავტონომიური რესპუბლიკის ხელმძღვანელ პირებთან და ქალაქ ბათუმის მერთან. აშშ-ის ხომალდზე საქართველოს სასაზღვრო პოლიციის სანაპირო დაცვის დეპარტამენტის წარმომადგენლების და აშშ-ის სამხედრო-საზღვაო ძალების ხომალდის მონაწილეობით დაგეგმილია ერთობლივი წრთვნები (PASSEX) მალთაყვის მიმართულებით გადაადგილების დროს. ამერიკული ხომალდიდან დესანტირებისა და ამფიბიური მანევრების დემონსტრირება გაიმართება.
ხომალდის ეკიპაჟის წევრებსა და სასაზღვრო პოლიციის სანაპირო დაცვის დეპარტამენტის თანამშრომლებს შორის გაიმართება ამხანაგური შეხვედრა ფეხბურთში. შემდეგ ამერიკელი სტუმრები ქართველ კოლეგებს საკუთარ ხომალდზე უმასპინძლებენ. აშშ-ის სამხედრო-საზღვაო ძალების ხომალდი OAK HILL (LSD-51) საქართველოს ტერიტორიულ წყლებს 20 მარტს დატოვებს“, – აღნიშნულია შსს-ს მიერ გავრცელებულ ინფორმაციაში.
საქართველოს ტერიტორიულ წყლებში აშშ-ს სამხედრო-საზღვაო ძალების ხომალდი შემოვიდა
2018/03/17 19:15:46
კომენტარები
ნანახია: 1137 ჯერ