სამტრედიის ქუჩაზე მომხდარ დაჭრის ფაქტზე სამართალდამცველებმა ერთი პირი დააკავეს. როგორც შსს-ში გამართულ ბრიფინგზე კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსმა მამუკა ჭელიძემ განაცხადა, პოლიციამ 1950 წელს დაბადებული გ.ც. მომხდარიდან მალევე დააკავეს. როგორც ჭელიძემ აღნიშნა, დაჭრა ურთიერთშელაპარაკების ნიადაგზე მოხდა.
„პოლიციამ დიდუბეში მომხდარი დაჭრის ფაქტი ცხელ კვალზე გახსნა.
შინაგან საქმეთა სამინისტროს თბილისის პოლიციის დეპარტამენტის დიდუბე-ჩუღურეთის სამმართველოს თანამშრომლებმა, გატარებული ოპერატიულ-სამძებრო და საგამოძიებო მოქმედებების შედეგად, 1950 წელს დაბადებული გ.ც. თბილისში, სამტრედიის ქუჩაზე, გუშინ გვიან ღამით მომხდარი დაჭრის ფაქტზე ცხელ კვალზე დააკავეს.
გამოძიებამ დაადგინა, რომ ბრალდებულმა, 1989 წელს დაბადებულ კ.გ.-ს, ურთიერთშელაპარაკებისას, მისი კუთვნილი ცეცხლსასროლი იარაღიდან გასროლით სხეულზე დაზიანება მიაყენა და შემთხვევის ადგილიდან მიიმალა. დაჭრილი მამაკაცი სამედიცინო დაწესებულებაში გადაიყვანეს. ამ დროისთვის, მის სიცოცხლეს საფრთხე არ ემუქრება.
გამოძიება ცეცხლსასროლი იარაღის უკანონოდ შეძენა-შენახვა-ტარებისა და ჯანმრთელობის განზრახ ნაკლებად მძიმე დაზიანების ფაქტებზე, საქართველოს სსკ-ს 118-ე და 236-ე მუხლებით მიმდინარეობს“, – განაცხადა მამუკა ჭელიძემ.