პარლამენტის იურიდიულ საკითხთა კომიტეტის თავმჯდომარე ეკა ბესელია ორგანიზაცია „საქართველოს ალიანსი უსაფრთხო გზებისთვის” წარმომადგენლებთან ერთად „საქართველოს საპატრიარქოს წმ. იოაკიმესა და ანას სახელობის სამედიცინო ცენტრს” ეწვია, სადაც საქართველოში აშშ – ის საელჩოს მხარდაჭერით, ახალშობილების მშობლებს საბავშვო სავარძლები გადასცა და სამგზავრო სავარძლების საჭიროებაზე ინფორმაცია მიაწოდა.
„ეს არაჩვეულებრივი აქცია თავისი შინაარსით ძალიან მნიშვნელოვან საკითხს და პრობლემას ეხმიანება – ეს არის უსაფრთხოების დაცვა ბავშვებისთვის. საბავშვო სამგზავრო სავარძლები, რომლებიც ჩვენ ერთობლივად დავარიგეთ, ემსახურება ამ იდეის პოპულარიზაციას, რომ ყველა მშობელმა ტრანსპორტით გადაადგილების დროს ბავშვი ატაროს სპეციალური სავარძლით. ეს მათი უსაფრთხოებისთვის, მათი დაცვისთვის ძალიან კომფორტული და ძალიან მნიშვნელოვანია. ბოლო პერიოდის სტატისტიკა აჩვენებს, რომ სამწუხაროდ, არის ავტოავარიის შემთხვევები, სადაც დაზიანებები ბავშვებს მიღებული აქვთ სწორედ იმიტომ, რომ მშობლები არ იყენებდნენ მათთვის საბავშვო სავარძლებს“, -განაცხადა ეკა ბესელიამ.
მისივე თქმით, საჭიროა მუშაობის დაწყება აღნიშნული საკითხის საკანონმდებლო დონეზე დასარეგულირებლად.
„ვფიქრობ, რომ ჩვენს პარტნიორ ორგანიზაციებთან და საერთაშორისო დონორებთან ერთად, ვისთანაც ვთანამშრომლობთ საგზაო უსაფრთხოების რეფორმაზე, ვიმუშაოთ საკანონმდებლო ცვლილებებზე, რომელიც გულისხმობს სწორედ საბავშვო სამგზავრო სავარძლების გამოყენების სამართლებრივ რეგულაციებს. ეს სჭირდებათ ბავშვებს, ეს სჭირდება მათ უსაფრთხოებას, მათ დაცვას და ეს აქციაც სწორედ ამ ძალიან კარგი იდეის პოპულარიზაციას ემსახურება“,-აღნიშნა იურიდიულ საკითხთა კომიტეტის თავმჯდომარემ.