არავის დაავიწყდება ის, რაც 11 წლის წინ თავს დაატყდა არამარტო ტელეკომპანია იმედს, არამედ მთელ ქვეყანას… ეს ისინი არიან, რომლებიც გვიმახსოვრებენ, თორემ ჩვენ ყველა და ყველაფერი ძალიან კარგად გვახსოვს, – ამის შესახებ გადაცემაში „პირისპირ“ იმედის დამფუძნებლის, ბადრი პატარკაციშვილის ოჯახის წევრმა, საგარეო საქმეთა მინისტრის მოადგილემ, ხათუნა თოთლაძემ განაცხადა.
მან პირდაპირ ეთერში გაიხსენა, თუ რა განცდა იყო მაშინ მათ ოჯახში და თქვა, რომ ეს იყო შიშის ღალატის და საშინელი ტკივილის განცდა.„წარმოიდგინეთ მაშინ ჩვენთვის იმედიც კი მოკვდა – იმედი, რომელიც არ იყიდებოდა… ეს არ იყო მხოლოდ „იმედის დარბევა. ეს იყო სადამსჯელო ღონისძიება. ამით დაისაჯა არამარტო ერთი კონკრეტული ოჯახის წარმომადგენელი – ბადრი პატარკაციშვილი, ამით დასაჯეს თავისუფალი სიტყვა საქართველოში“, – განაცხადა ხათუნა თოთლაძემ.
მისი თქმით, ყველაზე დიდი უსამართლობა თანმდევი ტერორის შემდეგ ბადრი პატარკაციშვილის მოღალატედ გამოცხადება იყო.
საქართველოს პროკურატურამ 2007 წელს ტელეკომპანია „იმედში“ შეჭრის და მისი დარბევის ფაქტზე შინაგან საქმეთა სამინისტროს სპეციალური ოპერატიული დეპარტამენტის ყოფილი დირექტორი ერეკლე კოდუა სამსახურებრივი უფლებამოსილების გადამეტების ბრალდებით სისხლის სამართლის პასუხისგებაში მისცა. სასამართლოში საქმის განხილვა 27 ივნისს დაიწყო.
ყოფილმა პრემიერმინისტრმა ზურაბ ნოღაიდელმა სასამართლოზე თქვა, რომ მიხეილ სააკაშვილისთვის “იმედის” სარედაქციო პოლიტიკა ინტერესის ობიექტი იყო. მან ასევე თქვა, რომ 2007 წლის ზაფხულში, სააკაშვილის ინიციატივით, ბადრი პატარკაციშვილთან მოლაპარაკებები დაიწყო “იმედის” და რკინიგზის აქტივების გაცვლასთან დაკავშირებით, თუმცა პატარკაციშვილმა ტელევიზია არ დათმო.
მიმდინარე წლის 20 მარტს, სასამართლოზე ჩვენება მისცა ნინო ბურჯანაძემ. მან სასამართლოს სხდომაზე ის კონკრეტული სახელები და გვარებიც თქვა, ვინც მისი მტკიცებით, დარბევის და ტელეკომპანიაში შეჭრის ბრძანება გასცა და ეს ადამიანი მიხეილ სააკაშვილი იყო.
ამ საქმეზე მიხეილ სააკაშვილს, ზურაბ ადეიშვილსა და დავით კეზერაშვილს პატიმრობა 2014 წლის 1 აგვიტოს შეეფარდათ.