გოგა ჩანადირი – მოეხადა ბოდიში, გადამდგარიყო და პრობლემაც მოგვარდებოდა

ფოტოგრაფი გოგა ჩანადირი ჭიდაობის ფედერაციაში განვითარებულ პროცესებს ეხმაურება და ფედერაციის პრეზიდენტს, გეგა გეგეშიძეს აკრიტიკებს.
“მესმის, რომ ახლობლობისა და კოლეგიალობის გამო, მოჭიდავეები ჭიდაობის ფედერაციის პრეზიდენტის, გეგა გეგეშიძის გათავისუფლებას ითხოვენ.
არ მიმაჩნია მართებულად.
ამით ვახალისებთ დაუსჯელობასა და ძალადობას.
კანონის წინაშე ყველა თანაბრად ვართ პასუხისმგებელნი.
გეგეშიძეს ბოდიშიც კი არ მოუხდია, არც დათუნაშვილისთვის, ვინც სცემა, არც საზოგადოებისთვის, ვის წინაშეც უპასუხისმგებლოდ მოიქცა, რაც იმას ნიშნავს, რომ სინდისის ქენჯნაც კი არ აწუხებს და დანაშაულსაც ვერ აცნობიერებს. ჩემში სიბრაზეს სწორედ ეს იწვევს.
მოეხადა ბოდიში, გადამდგარიყო და პრობლემაც მოგვარდებოდა.
არა, დანაშაულს არ აღიარებს.
ასეთი ადამიანი ფედერაციის პრეზიდენტი არ უნდა იყოს, ასეთი ადამიანი ჩვენი გადასახადებისგან ხელფასს არ უნდა იღებდეს.
ამ ქვეყანაში თავგასულობა, უპასუხისმგებლობა და ძალადობა უნდა დასრულდეს!”, – წერს გოგოა ჩანადირი.
შეგახსენებთ, რომ მოჭიდავე ზურაბ დათუნაშვილმა სოციალურ ქსელ “ფეისბუქში” განცხადება გაავრცელა. დათუნაშვილი აცხადებს, რომ 11 იანვარს საქართველოს ჩემპიონატზე მას საქართველოს ჭიდაობის ფედერაციის პრეზიდენტმა, გეგა გეგეშიძემ თავში რკინის ბლაგვი საგანი ჩაარტყა. გუშინ, შინაგან საქმეთა სამინისტრომ საქართველოს ჭიდაობის ფედერაციის პრეზიდენტი თამაზ (გეგა) გეგეშიძე, სპორტის სასახლეში მომხდარ ფაქტთან დაკავშირებით, სისხლის სამართლის კოდექსის 126-ე მუხლის პირველი ნაწილით დააკავა, რაც ძალადობას გულისხმობს.