ქართული ჭიდაობის ფედერაციის პრეზიდენტი გელა ბერუაშვილი სახელმწიფო აუდიტის სამსახურის დასკვნას ეხმიანება და ანგარიშში მოყვანილ ინფორმაციას სიცრუეს უწოდებს. ინფორმაციას 1tv.ge ავრცელებს.
გელა ბერუაშვილის თქმით, ის ადასტურებს, რომ ტურნირის გამარჯვებულისთვის გადასაცემი ბინა საკუთარი შვილების სამშენებლო კომპანიაში იყიდა, თუმცა განმარტავს, რომ ეს ბიუჯეტის დაზოგვის მიზნით გააკეთა. ბერუაშვილი ასევე ამბობს, რომ მის შვილს ფედერაციაში მონიტორინის ხელმძღვანელად არასდროს უმუშავია.
„ბინა, რომელიც გამარჯვებულ კაციაშვილს გადავეცით, კვადრატული 330 დოლარად შევიძინეთ, 170 დოლარით ნაკლებად. რაც შეეხება იმას, რომ აუდიტის დასკვნაში წერია, თითქოს იმ კორპუსში კვადრატული 1050 ლარი ღირდა და ჩვენ 48 ლარით უფრო ძვირად 1098 ლარად შეიძინეთ, ტყუილია, რადგან მანდ წერია, რომ 50 კვადრატული ბინა ვიყიდეთ, როცა სინამდვილეში ბინა 60 კვადრატია და ეგ სხვაობაც მაქედან გამომდინარეობს. მე აუდიტს მივუტანე და ვაჩვენე, რომ არის 60 კვადრატი. შესაძლებელია ამ ბინის აზომვა და ნახავენ თავადაც“, – განაცხადა ბერუაშვილმა.
აუდიტის დასკვნაში ნათქვამია, რომ 2016-17 წლებში სხვადასხვა მუნიციპალიტეტში ჩატარებული შეჯიბრების სატრანსპორტო ხარჯებისთვის გამოყოფილი 32,338 ლარიდან 28,987 ლარი ფედერაციის პრეზიდენტის შვილის ანგარიშზე გადაირიცხა.
