”არასამთავრობო სექტორის მოთხოვნა, რომ გადადგეს სასამართლო ხელისუფლება, არ ჯდება კონსტიტუციაში, კანონში”

,,არასამთავრობო სექტორის მოთხოვნა, რომ გადადგეს სასამართლო ხელისუფლება, არ ჯდება კონსტიტუციაში, კანონში”, – ამის შესახებ მოსამართლე ლევან მურუსიძემ ჟურნალისტებს სასტუმრო “რედისონ ბლუ ივერიაში” განუცხადა.
“მათ აქვთ უფლება, დააფიქსირონ თავიანთი პოზიცია, მაგრამ მე არ ვეთანხმები ერთს: არასამთავრობო სექტორი ამბობდეს, რომ უნდა გადადგეს სასამართლო ხელისუფლება. ეს არ არის მათ კომპეტენციაში. მათ შეუძლიათ დააფიქსირონ თავიანთი პოზიცია, ჰქონდეთ პოზიცია ძალიან მწვავე, მაგრამ ის, რომ სასამართლო ხელისუფლების გადადგომას მოითხოვდნენ, სცდება არასამთავრობო ორგანიზაციების კომპეტენციას. შეუძლიათ გამოაცხადონ უნდობლობა, ჰქონდეთ თავიანთი პოზიცია თითოეული მოსამართლის მიმართ, მოვლენების მიმართ, მაგრამ არასამთავრობო სექტორის მოთხოვნა, გადადგეს სასამართლო ხელისუფლება, არ ჯდება კონსტიტუციაში, კანონში”, -განაცხადა მურუსიძემ.
მისივე თქმით, ​2012 წლიდან, “ქართულ ოცნებამ” განახორციელა ძალიან ბევრი ისეთი საკანონმდებლო ცვლილება, რომლის თანახმადაც, მოსამართლეს მისცა ძალიან დიდი გარანტიები. ​
“2012 წლიდან, “ქართულ ოცნებამ” განახორციელა ძალიან ბევრი ისეთი საკანონმდებლო ცვლილება და ეს დააგვირგვინა კონსტიტუციით, რომლის თანახმადაც, მოსამართლეს მისცა ძალიან დიდი გარანტიები და მე არ ვეთანხმები, რომ ეს წაღმა დატრიალებული ბორბალი უკუღმა დატრიალდეს“, – აღნიშნა მურუსიძემ.
სასტუმრო “რედისონ ბლუ ივერიაში” საქართველოს პარლამენტის თავმჯდომარის, ირაკლი კობახიძის ხელმძღვანელობით, სასამართლო რეფორმის სამუშაო ჯგუფის შეხვედრა მიმდინარეობს. პარალელურად კი “რედისონთან” სამოქალაქო აქტივისტების საპროტესტო აქცია მიმდინარეობს. ისინი უმაღლესი საბჭოს მოქმედი შემადგენლობის შეცვლას ითხოვენ.