კომუნიკაციების ეროვნული კომისიის თავმჯდომარემ კახა ბექაურმა კომპანია “ბილაინთან” დაკავშირებით მის მიერ გაკეთებულ განცხადებაზე “იმედი LIVE”-ის ეთერში განმარტება გააკეთა.
ბექაურის თქმით, ზოგიერთი მედიასაშუალების მიერ მისი განცხადების არასწორი ინტერპრეტირება მოხდა.
“იქვე დავაზუსტე კომენტარში, რომ მფლობელის მიერ “ბილაინის” გაყიდვა არ ნიშნავს, რომ ის ბაზარზე არ იარსებებს. ნებისმიერმა მესაკუთრემ, “ბილაინის” იქნება თუ სხვა, არ ნიშანვს რომ ბაზარს ტოვებს. ასევე არავითარი მესამე კომპანიის გაქრობა არ იგეგმება. ჩვენ ვფიქრობთ, რომ სამი კომპანია დღევანდელ საკომუნიკაციო ბაზარზე იმისთვის, რომ საცალო კონკურენცია იყოს, საკმარისია. დღევანდელი გადასახედიდან რამხელაც ბაზარია, ვფიქრობთ, რომ ოთხი მოთამაშე ბევრია და ოთხ მოთამაშეზე გადანაწილებულმა ბაზარმა შესაძლოა პრობლემები შექმნას: შემცირდება შემოსავლები, შემცირდება მოგება, შემცირდება ინვესტიციებიც სამომავლო განვითარებაში იმიტომ, რომ ეს სფერო ტექნოლოგიური სფეროა და ძალიან სწრაფად ითხოვს მოდერნიზებას”, – განაცხადა კახა ბექაურმა.
კომუნიკაციების კომისიის თავმჯდომარის თქმით, შემოსავლების დაახლოებით 15 % მიდის ხოლმე კაპიტალურ დაბანდებაში, რაც ერთ-ერთი მაღალი მაჩვენებელია სფეროებში. ბექაურის თქმით, ასევე მნიშვნელოვანია, რომ კომპანიები სხვა შემოსავლებითაც იყვნენ უზრუნველყოფილები და ამ კონტექსტში ბექაურმა თქვა, რომ უნდა დაინერგოს მობილური გადახდები, რასაც მისი განმარტებით, ასოცირების ხელშეკრულებაც გვავალდებულებს.
“ეს არის პატარა, ყოველდღიური გადახდები, კერძოდ აღიჭურვოს სატელეკომუნიკაციო კომპანიები უფლებით, რომ მათ ყოველდღიურად არა უმეტეს 50 ევროსი (ევროპის მასშტაბით ეს ზღვარია), ხოლო თვიურად არა უმეტეს 300 ევროთი, მომხმარებელმა შეძლოს ონლაინშესყიდვების განხორციელება, ისეთების მაგალითად როგორიც არის კინოს ბილეთები, მატარებლის ბილეთები, და ა.შ. ეს არა მხოლოდ ტელესაკომუნიკაციო კომპანიებისთვის არის მოსახერხებელი, არამედ ავითარებს ელექტრონულ კომერციასაც”, – განაცხადა ბექაურმა და დასძინა, რომ ეს ეროვნული ბანკის ზედამხედველობის სფეროა და კომუნიკაციების ეროვნული კომისია მათთან თანამშრომლობას აპირებს ამ მიმართულებით.
კახა ბექაურმა ასევე ისაუბრა საქართველოში მობილური ქსელების გაძვირებასთან დაკავშირებით.