“საკმაოდ ბევრი ადამიანი ჩანს ჩართული ამ დანაშაულებრივ ქმედებაში, დაკავებულ პირთა რაოდენობაც მეტყველებს ამაზე”

მივესალმები გამოძიების სწრაფად მოქმედებას, რა თქმა უნდა, ეს დასაწყისია და არ არის დასასრული, იმიტომ, რომ საკმაოდ ბევრი ადამიანი ჩანს ჩართული ამ უკანონო დანაშაულებრივ ქმედებაში – ამის შესახებ პარლამენტის იურიდიულ საკითხთა კომიტეტის ყოფილმა თავმჯდომარემ, ეკა ბესელიამ ჟურნალისტებს განუცხადა.
მისი თქმით, ახლა მთავარია დადგინდეს, გარდა გამავრცელებელი პირების პასუხისმგებლობისა, რომლებიც პასუხისგებაში არიან მიცემული, ის, ვისგანაც წამოვიდა თავიდან ეს დანაშაულებრივი განზრახვა და გადაწყვეტილება.
„მივესალმები გამოძიების სწრაფად მოქმედებას, რა თქმა უნდა, ეს დასაწყისია და არ არის დასასრული, იმიტომ, რომ საკმაოდ ბევრი ადამიანი ჩანს ჩართული ამ უკანონო დანაშაულებრივ ქმედებაში. დაკავებულ პირთა რაოდენობაც მეტყველებს ამაზე, თუმცა, ეს რიცხვი როგორც ჩანს, გაცილებით მეტია. ველოდები გამოძიების შემდეგ ნაბიჯებს, რადგან მთავარია გარდა გამავრცელებელი პირების პასუხისმგებლობისა, რომლებიც პასუხისგებაში არიან მიცემული, ის, ვისგანაც წამოვიდა თავიდან ეს დანაშაულებრივი განზრახვა და გადაწყვეტილება. ვინც იყო ინიციატორი ამ უკანონო ჩანაწერის გავრცელების, ვინც იყო ამ დანაშაულებრივი ქმედების სათავეში. ამაზე ველოდები პასუხს გამოძიებისგან. ის, რომ გუშინაც ვრცელდებოდა ეს უკანონო ჩანაწერი, ამის თაობაზე ინფორმაცია ძალიან ბევრ ადამიანს ჰქონდა და სწრაფი მოქმედება და პრევენციული ღონისძიებებია საჭირო“, – განაცხადა ეკა ბესელიამ.
ბესელიას თქმით, მას დღეს შინაგან საქმეთა სამინისტროში შეხვედრა ექნება.
“გარკვეული პროცედურებიც იქნება ჩასატარებელი”,- აღნიშნა ბესელიამ.
შინაგან საქმეთა სამინისტრომ პირადი ცხოვრების ამსახველი ვიდეოჩანაწერის შენახვისა და მასობრივად გავრცელების ფაქტზე 16 პირი დააკავა.