ეკა ბესელია – მინდა, რომ გადაწყვეტილებები მივიღოთ დღეს

პარლამენტის უმრავლესობის წევრის, ეკა ბესელიას განცხადებით, საპარლამენტო უმრავლესობის სხდომაზე მოსამართლეთა შერჩევის კრიტერიუმებზე ისაუბრებენ. როგორც ეკა ბესელიამ პარტია ,,ქართული ოცნების“ ოფისთან, ჟურნალისტებთან საუბრისას აღნიშნა, დღევანდელ შეხვედრაზე იურიდიული კომიტეტის თავმჯდომარის არჩევის საკითხზეც ისაუბრებენ.
,,მაქვს ოთხი ძირითადი საკითხი, რაც მინდა, რომ დღეს განვიხილო ამ ფორმატში და გადაწყვეტილებებიც უნდა შევაჯერო და მივიღო. პირველი – სამუშაო ჯგუფის ფორმატის ცვლილებასთან დაკავშირებით ის მიმაჩნია მნიშვნელოვნად, რომ კრიტერიუმებსა და პროცედურაზე ვიმსჯელოთ. კანონმდებლობაში უნდა შევიდეს ცვლილებები და არ დაიწეროს ეს პროექტი იმ მოსამართლეების მონაწილეობით, რომელთაც ინტერესთა კონფლიქტი აქვთ და თავად სურთ, გახდნენ უზენაესი სასამართლოს მოსამართლეები; მეორე – შეჩერდეს მოსამართლეთა უვადოდ დანიშვნა და ეს ცვლილება მომზადებული მაქვს, როგორც წინა სხდომაზე შევთანხმდით. მესამე – ეს არის თავად კრიტერიუმები და პროცედურა, რომელიც უნდა მივიღოთ კანონში, როგორც ახალი მექანიზმი, რისკების დასაზღვევად. მოსამართლეთა შერჩევის ჯანსაღი პროცესი გაიმართოს და ავირჩიოთ საუკეთესო მოსამართლეები უზენაეს სასამართლოში. მეოთხე – უნდა ვიმსჯელოთ იურიდიული კომიტეტის თავმჯდომარის საკითხთან დაკავშირებით. ესეც შემადგენელი საკითხია მთელი პროცესის და ჩვენთვის ძალიან დიდი მნიშვნელობა აქვს, იმ ფასეულობებისა და ღირებულებების დამცველი იყოს ამ კომიტეტში ახალი თავმჯდომარე, რომელსაც ჩვენ პრინციპულად ვიცავთ. არა მხოლოდ ვისაუბრებთ, არამედ მინდა, რომ გადაწყვეტილებები მივიღოთ დღეს, ეს იქნება ჩემი პოზიცია“,- განაცხადა ეკა ბესელიამ.
ცნობისათვის, „ქართული ოცნების” ცენტრალურ ოფისში დღეს უმრავლესობის სხდომა მიმდინარეობს. შეხვედრას პარტიის თავმჯდომარე – ბიძინა ივანიშვილი ესწრება.