საპარლამენტო უმრავლესობის წევრი, დიმიტრი ხუნდაძე ფიქრობს, რომ გუნდში განსხვავებული პოზიციების არსებობა ბუნებრივი პროცესია, თუმცა დაპირისპირება გუნდის შიგნით უნდა მოგვარდეს. ეს განცხადება დიმიტრი ხუნდაძემ „ქართული ოცნების“ ოფისში უმრავლესობის სხდომის დაწყებამდე გაკეთა.
ხუნდაძის აზრით, უმრავლესობის სხდომაზე საუბარი სწორედ გუნდური თამაშის წესების დაცვაზე იქნება და მას იმედი აქვს, რომ შეხვედრა შედეგიანი იქნება.
„ვფიქრობ, რომ საბოლოოდ ჩამოვყალიბდებით. ასევე ვფიქრობ, საუბარი იქნება გუნდური წესების თამაშზე. ამაზე მსჯელობაც შედეგიანი იქნება. ზოგიერთ ჟურნალისტს მოლოდინი აქვს, რომ გუნდში იმაზე ნაკლები გამოვალთ, ვიდრე შევალთ, ეს ასე არ იქნება, რადგან ჩვენ ერთმანეთს პატივს ვცემთ. თითოეულ გუნდის წევრს თავის წილი დამსახურება აქვს. ზოგს მეტი, ზოგს ნაკლები. მაგრამ მიზანი ერთია. ეს გუნდი არსებობს არა მხოლოდ იმისთვის, რომ გუნდი იყოს, არამედ იმისთვის, რომ ქვეყანაში მიმდინარე პროცესებზე გააზრებული პასუხისმგებლობა აიღოს და ქვეყანა სწორად წაიყვანოს“, – განაცხადა დიმიტრი ხუნდაძემ.